د افغانستان پخواني ولسمشر حامد کرزي د ماشومانو د نړیوالې ورځې په مناسبت د هېواد په کچه د ماشومانو د وضعیت په اړه اندېښنه څرګنده کړې ده. هغه د دې ورځې په مناسبت پر خپله ایکسپاڼه لیکلي چې د ملګرو ملتونو راپورونه ښيي، په افغانستان کې نژدې څلور میلیونه ماشومان د سختې خوارځواکۍ له ګواښ سره مخ دي.
کرزي د نومبر په ۲۰مه، د جمعې په ورځ، یادونه کړې چې د لومړنیو زدهکړو په عمر کې د ماشومانو تر نیمایي زیات ښوونځیو ته له تګ بېبرخې دي. هغه د بېوزلۍ او محرومیت په اړه اندېښنه څرګندوي چې دا وضعیت د ماشومانو د روغتیا او راتلونکي لپاره خطرناک دی.
پخواني ولسمشر ټینګار کړی چې د نجونو او هلکانو لپاره د زدهکړو دروازې باید له هېڅ ډول محدودیت پرته پرانیستل شي. کرزي د نجونو پر زدهکړو د لګېدلو محدودیتونو د لرې کولو غوښتنه کړې، چې طالبانو د ۱۴۰۰ کال په زمري میاشت کې له شپږم ټولګي پورته نجونې ښوونځیو ته له تګ منع کړې.
د هغه په وینا، د ماشومانو د اساسي حقونو، زدهکړو، روغتیايي خدمتونو او امنیت په تامین کې باید جدي هڅې وشي. کرزي د دې وضعیت د حل لپاره د ټولنې او کورنیو امنیت ته هم اشاره کړې، چې د ماشومانو د خوارځواکۍ او محرومیت له امله تهدید شوی دی.
د ماشومانو د نړیوالې ورځې په مناسبت، کرزي د دې موضوع په اړه د نړیوالې ټولنې توجه هم غوښتې، څو د افغانستان د ماشومانو د حقونو د تامین لپاره اقدامات وشي.
موضوع: د افغانستان ماشومانو خوارځواکۍ
سرچینه: Azadi Radio Pashto NEWS