د ایران یو لوړپوړی چارواکی وایي چې د قطر د پراخو دیپلوماتیکو هڅو سره سره، تهران او واشنګټن لا هم د جګړې د پای ته رسولو لپاره یوې هوکړې ته نه دي رسیدلي. دغه چارواکی د سې شنبې په ورځ، د لړم/عقرب په ۱۲مه، روېټرز خبري اژانس ته وویل چې منځګړي د دواړو هېوادونو ترمنځ د اختلافاتو د کمولو لپاره جدي هڅې کوي، خو ایران د امریکا غوښتنې نه مني چې هغوی یې له حده زیاتې بولي.
د نوموړي په وینا، د هرمز تنګي د بیا پرانیستلو او د اټمي خبرو د پیل لپاره باید لومړی د ایران شرطونه ومنل شي. دا څرګندونې وروسته له دې کیږي چې د قطر منځګړي د دوشنبې په شپه تهران ته ولاړل او له ایراني چارواکو سره د احتمالي هوکړې پر مسودې خبرې وکړې چې له تېرو اتو ورځو راهیسې تر بحث لاندې ده.
د قطر د بهرنیو چارو وزارت ویاند ماجد الانصاري وویل چې امریکا او ایران دواړه د منځګړو وړاندیزونه ارزوي او د کړکېچ د زیاتېدو د مخنیوي لپاره جدي سیمهییزې هڅې روانې دي. نوموړي هیله څرګنده کړه چې دواړه لوري به یوې هوکړې ته ورسېږي او د نورو خبرو لپاره به زمینه برابره شي.
روېټرز د خبرو له بهیر څخه د یوه باخبره چارواکي په حواله ویلي چې تمه ده واشنګټن او تهران په راتلونکو ۳۶ ساعتونو کې د منځګړو وړاندیزونو ته ځوابونه ورکړي. په همدې حال کې، یوه امریکايي چارواکي ویلي چې د امریکا پوځ تېره شپه د ایران پر قشم ټاپو محدود بریدونه کړي او هغه ځمکني توغندي یې په نښه کړي چې د امریکايي ځواکونو پر ضد کارول کېدل.
د امریکا ولسمشر ډونالد ټرمپ هم د سې شنبې په ورځ له فاکسنیوز سره په خبرو کې د اړتیا په صورت کې د نورو پوځي اقداماتو احتمال مطرح کړی دی. ایراني چارواکو خبرداری ورکړی چې د امریکا هر نوي برید ته به سخت ځواب ورکړي. د ایران د پارلمان مشر محمد باقر قالیباف ویلي چې تهران خپل ځواب وړاندې کړی او اوس د پرېکړې وار د واشنګټن دی. د ایران او امریکا ترمنځ د روانو غیر مستقیمو خبرو ترڅنګ، سعودي عربستان او نور سیمهییز هېوادونه هم هڅه کوي چې د جګړې د بیا پراخېدو مخه ونیسي.
موضوع: د ایران او امریکا ترمنځ د هوکړې اختلافات
سرچینه: Azadi Radio Pashto Reports
