په افغانستان کې د ملګرو ملتونو مرستندویه ماموریت (یوناما) د پنجشنبې په ورځ په یوه اعلامیه کې تایید کړه چې په کونړ او هلمند ولایتونو کې د ترسره شوو هوايي بریدونو له امله لږ تر لږه ۱۰ ملکیان، چې زیاتره یې ماشومان دي، وژل شوي او نهه نور ټپیان شوي دي.
یوناما په دې اعلامیه کې څرګنده کړې چې ملکیان لا هم د سرحدي نښتو له امله اغېزمن کیږي. دوی د ملکیانو د مرګژوبلې د مخنیوي لپاره د کړکېچ په کمولو او نړیوالو حقوقو ته په درناوي ټینګار کړی دی.
د طالبانو د حکومت ویاند ذبیحالله مجاهد مخکې له دې ویلي و چې پاکستاني الوتکو د کونړ شلتن ولسوالۍ چوګام او د هلمند ګرمسیر ولسوالۍ په صفار سیمو کې بمبار کړی، چې په دې برید کې لږ تر لږه ۹ ملکیان وژل شوي او ۱۱ نور ټپیان شوي دي.
د پاکستان د اطلاعاتو وزارت هم د دې بریدونو تایید کړی او ادعا یې کړې چې د دغه هېواد ځواکونو د «غضب للحق» عملیاتو په ترڅ کې په افغانستان کې د وسلهوالو ډلو پر پټنځایونو هوايي بریدونه کړي، چې په دې بریدونو کې ۲۲ وسلهوال وژل شوي دي.
یوناما د دې پېښو په اړه د نړیوالو حقوقو او د ملکیانو د خوندیتوب په اړه اندېښنه څرګندوي او د دې ډول بریدونو د مخنیوي لپاره د اقداماتو غوښتنه کوي.
موضوع: یوناما د ملکیانو د مرګ ژوبلې تایید
سرچینه: Azadi Radio Pashto NEWS
