د افغان کډوالو د بېرته ستنولو په اړه د طالبانو او فرانسې ترمنځ تخنیکي خبرې روانې دي، چې په دې لړ کې د طالبانو څلور استازي د فرانسې سفر ته چمتو کېږي. د طالبانو د حکومت یوه ډیپلومات د یکشنبې په ورځ ازادي راډیو ته وویل چې د دغو استازو پاسپورټونه د ویزو لپاره د فرانسې سفارت ته سپارل شوي دي. تر اوسه پورې نه ده معلومه چې څوک به د طالبانو په استازیتوب فرانسې ته لاړ شي او د سفر دقیق تاریخ هم نه دی اعلان شوی.
د فرانسې د بهرنیو چارو وزارت مخکې ویلي و چې د هغو افغان کډوالو د بېرته ستنېدو لپاره تخنیکي خبرې ترسره کېږي چې په غیرقانوني توګه په فرانسه کې اوسېږي او د دغه هېواد امنیت ته ګواښ ګڼل کېږي. فرانسوي چارواکو ټینګار کړی چې پاریس د طالبانو حکومت په رسمیت نه پېژني او د دې لپاره هېڅ نیت هم نه لري.
د کابل پوهنتون پخوانی استاد نصرالله ستانکزی چې اوس په فرانسه کې دی، ویلي چې دا مسله د راتلونکي کال له ټاکنو سره تړاو لري. هغه زیاتوي چې ممکن د ټاکنو وروسته د فرانسې پالیسۍ بدلې شي، خو تر هغه وخته د افغان کډوالو د ایستلو احتمال شته.
د فرانسې د کورنیو چارو وزیر لوران نونیز د نومبر په ۲مه وویل چې دوی د هغو افغانانو د ایستلو په اړه د طالبانو له چارواکو سره خبرې پیل کړي، چې قانوني اسناد نه لري. دغه اعلان د هغو افغانانو ترمنځ اندېښنې راپارولي چې له کلونو راهیسې په فرانسه کې اوسېږي.
په پاریس کې مېشت یو افغان چې نه غواړي نوم یې واخیستل شي، ویلي چې دوه کاله مخکې په غیرقانوني توګه فرانسې ته راغلی، خو لا هم د اوسېدو قانوني اسناد نه لري. هغه د خپل وضعیت په اړه اندېښنه څرګندوي. په ورته وخت کې، د بشري حقونو یو شمېر سازمانونه د فرانسې حکومت ته غږ کړی چې د افغان کډوالو د ایستلو له پرېکړې لاس واخلي او له طالبانو سره خبرې ونه کړي.
موضوع: افغان کډوال له فرانسه څخه راستنېدل
سرچینه: Azadi Radio Pashto Reports
