د افغانستان په کچه د پولیو (فلج اطفال) پېښې په دې کال کې زیاتې شوې دي. د ماشومانو د ملاتړ صندوق (یونیسف) وايي چې هر ماشوم حق لري چې روغ او له پولیو څخه خوندي وي. یونیسف د ۵ عقرب په ورځ په یوه اعلامیه کې وویل چې د نړیوال سازمان 'روتری' په ملاتړ هڅه کوي چې د پولیو واکسین ټول ماشومانو ته ورسوي.
خو د پولیو واکسین کمپاینونه په افغانستان کې د بشپړ تطبیق له ستونزو سره مخ دي. راشد انوري، چې د ماشومانو د واکسیناسیون په برخه کې ۱۴ کاله تجربه لري، د نړیوالې روغتیا سازمان (WHO) سره په خبرو کې وویل چې ناوړه هوا، اوږده واټنونه او فزیکي مشکلات د واکسیناتورانو لپاره د دوردست سیمو ته رسېدل سختوي.
انوري زیاته کړه چې د کورنیو اندیښنې باید درک شي او هغوی ته قناعت ورکړل شي چې واکسین د دوی د ماشوم لپاره ډېر مهم دی. د هغه په وینا، دا کار د کورنیو سره د اړیکو له لارې ممکن دی.
د پولیو واکسین کمپاینونه د پنځو کلونو لاندې ماشومانو لپاره تل له مشکلاتو سره مخ دي. د طالبانو د حکومت له بیا تسلط وروسته، دا کمپاینونه د کور په کور پر ځای په جوماتونو کې ترسره کېږي، چې له امله یې ډېر ماشومان له واکسین څخه پاتې کېږي.
یو مدني فعال چې نه غواړي نوم یې واخیستل شي، وویل چې د پولیو د مخنیوي لپاره باید ټول موانع له منځه لاړ شي. انوري همدارنګه وویل چې د ټولنې مشران او دیني عالمان د کورنیو د تشویق لپاره مهم رول لري.
یونیسف، د 'پولیو فری' بنیاد او د نړیوالې روغتیا سازمان په شمول نړیوالې ادارې د پولیو د له منځه وړلو لپاره کلونه هڅه کوي، خو د دې کال په پرتله د پولیو پېښې په زیاتیدو دي. د نړیوالې روغتیا سازمان په تازه راپور کې د افغانستان په کندهار، ننگرهار او کابل کې د پولیو شپږ نوې مثبتې پېښې ثبت شوې دي.
د افغانانو د پاکستان او ایران څخه د پراخې راستنېدو له امله د پولیو ویروس د خپریدو خطر زیات شوی دی. د صحي کارکوونکو په وینا، د تازه راستنېدونکو ماشومانو اکثریت په منظم ډول واکسین نه دي شوي، چې د دې ویروس د خپریدو خطر زیاتوي.
موضوع: د پولیو واکسین کمپاینونه
سرچینه: Azadi Radio گزارش ها
