جاپان او جنوبي کوریا تایید کړې چې شمالي کوریا د یکشنبې په ورځ لږ تر لږه یو بالستیک توغندی د کوریا ټاپووزمې په ختیځ کې سمندر ته وتوغولی دی. د جنوبي کوریا پوځ ویلي چې دغه توغندی شاوخوا ۴۵۰ کیلومتره واټن ووهه. د جاپان دفاع وزارت هم ویلي چې توغندی د جاپان له ځانګړې اقتصادي سیمې بهر سمندر ته لوېدلی دی.
شمالي کوریا مخکې له دې د سپټمبر په ۱۲مه هم څو لنډ واټنه بالستیک توغندي سمندر ته توغولي وو. د دې هیواد لخوا توغول شوي توغندي یوه ورځ وروسته له هغه ترسره شول چې د جنوبي کوریا، امریکا او جاپان پنځه ورځني ګډ پوځي تمرینات پای ته ورسېدل.
شمالي کوریا په منظم ډول بالستیک توغندي او د وسلو نور سیسټمونه ازمويي. کارپوهان وایي، دغه ازموینې د پوځي وړتیاوو د لا پیاوړتیا او د ځواک د ښودلو لپاره ترسره کېږي. د کیم جونګ اون په مشرۍ شمالي کوریا د ملګرو ملتونو د امنیت شورا د څو پرېکړه لیکونو له مخې د بالستیک توغندیو له ازموینې منع ده، خو دغه هیواد بیا هم د توغندیو ازموینې ته دوام ورکوي.
د جنوبي کوریا او جاپان چارواکي د دې توغندیو ازموینې په اړه اندیښنه څرګندوي او وایي چې دا د سیمې د امنیت لپاره خطرناک دی. د دوی په وینا، شمالي کوریا د دې ډول فعالیتونو له لارې د نړیوالو فشارونو سره سره د خپلو نظامي وړتیاوو د پیاوړتیا هڅه کوي.
موضوع: شمالي کوریا د بالستیک توغندیو ازموینې
سرچینه: Azadi Radio Pashto NEWS
