د امریکا د استازو جرګې غړي سکاټ پیټرز د افغانانو د ایستلو په اړه د اندېښنو په دوام ټینګار کړی چې امریکا باید له هغو افغانانو سره خپلې ژمنې پر ځای کړي چې د امریکايي ځواکونو سره یې کار کړی دی.
پیټرز د پنجشنبې په ورځ، د لړم په ۱۴، په خپله ایکسپاڼه کې څرګنده کړې چې د دغو افغانانو او د هغوی د کورنیو بېرته طالبانو ته سپارل د امریکا له ژمنو سرغړونه ګڼل کیږي. نوموړي زیاته کړې چې قانون جوړوونکي به د افغانانو د ایستلو په پروسه کې د پاکستان د احتمالي رول په اړه د ځوابونو غوښتنه وکړي او د افغانانو د خوندیتوب لپاره به قانوني اقداماتو ته دوام ورکړي.
دا څرګندونې وروسته له هغه کیږي چې د نومبر پر دویمه، د پیټرز په مشرۍ، د کانګرس ۶۶ غړو د ټرمپ له ادارې غوښتنه وکړه چې افغانستان ته د افغان کډوالو د ایستلو پلان لغوه کړي. په همدې حال کې، د نیویارک یوې فدرالي محکمې د افغانستان یا پاکستان ته د یو شمېر افغانانو ایستل ترشنبې د نومبر تر اوومې نیټې پورې موقتاً درولي دي.
د افغان کډوالو ملاتړي سازمان افغان ایواک هم د پنجشنبې په ورځ وویل چې د امریکا د کډوالۍ او ګمرکونو د قانون پلي کولو ادارې د دغو افغانانو د ایستلو لپاره د نومبر ۱۶ نوې نیټه ټاکلې ده. دغه وضعیت د افغانانو لپاره د خوندیتوب او د دوی د ایستلو پروسې په اړه د اندېښنو لامل شوی دی.
موضوع: افغان کډوال د امریکا له خوا ایستل
سرچینه: Azadi Radio Pashto NEWS
