د سعودي عربستان د انرژۍ شرکت «ډېلټا انرژي» او یوه پاکستاني دولتي شرکت ترمنځ د شاوخوا ۳۰ میلیارده ډالرو په ارزښت د ګازو د نل‌لیکو او نورو تأسیساتو د جوړولو د امکاناتو د څېړلو هوکړه لاسلیک شوې ده.

د روېټرز خبري اژانس د راپور له مخې، دا خبرپاڼه د دواړو شرکتونو له‌خوا د سې شنبې په ورځ، د لړم په ۲۶مه، خپره شوې. په دې هوکړه کې د افغانستان له پولې د پاکستان تر ګوادر بندر او د هند تر پولې د ګازو د نل‌لیکو غځول شامل دي.

سعودي شرکت د افغانستان د کشک د ګازو زېرمې او نورې سرچینې د دې نل‌لیکو لپاره د احتمالي ګازو تأمین کوونکو په توګه یادې کړې دي. دا پروژه د ټاپي پروژې سره چې د ترکمنستان پر ګازو تکیه لري، جلا ګڼل شوې ده.

خو دواړه شرکتونه ټینګار کوي چې دا هوکړه یوازې د پروژو د امکاناتو د ارزونې لپاره ده، او تر اوسه یې د پانګونې یا عملي کار لپاره وروستۍ پرېکړه نه‌ده شوې. د دې پروژې په اړه لا هم د نورو معلوماتو او د عملي کار د پیل په اړه انتظار دی.

د دې هوکړې په ترڅ کې، د سعودي عربستان او پاکستان ترمنځ د انرژۍ په برخه کې همکاري لا پسې پیاوړې کېږي، چې د دواړو هېوادونو اقتصادي اړیکو ته وده ورکوي.

موضوع: د سعودي عربستان او پاکستان د ګازو د نل‌لیکو پروژې

سرچینه: Azadi Radio Pashto NEWS

خبر شریک کړئ