د امریکا د بهرنیو چارو وزارت اعلان کړی چې پر هغو هېوادونو به سخت بندیزونه ولګوي چې امریکايي وګړي په کې په ناعادلانه توګه نیول شوي وي. افغانستان هم د دغو هېوادونو په لېست کې شامل دی. د بهرنیو چارو وزارت یوه ویاند ازادي راډیو ته وویل، که چیرې کوم بهرنی حکومت د ناعادلانه نیونو په کې ښکېل وي، نو واشنګټن به د هغه هېواد د کړنو پر وړاندې غبرګون وښيي.
ویاند زیاته کړه چې د غبرګون په لړ کې ممکن اقتصادي بندیزونه، د ویزو محدودیتونه، د بهرنیو مرستو کمول یا بندول، او د امریکايي وګړو سفر محدودول شامل وي. د امریکا د بهرنیو چارو وزارت په تکرار سره د طالبانو حکومت ته ویلي چې د ناعادلانه نیول شوي امریکايي وګړي محمود شاه حبیبي خوشې کړي او د بل امریکايي وګړي پاول اوربي برخلیک روښانه کړي.
د محمود شاه حبیبي ورور، احمد شاه حبیبي، چې د خپل ورور د قضیې په اړه له امریکايي چارواکو سره خبرې کوي، ویلي چې هغه باور لري چې محمود شاه حبیبي د طالبانو په بند کې دی. هغه د جمعې په ورځ ازادي راډیو ته وویل: "زموږ هیله دا ده چې امریکا له طالبانو سره د خبرو له لارې یوې پایلې ته ورسېږي."
امریکايي چارواکي وایي چې محمود شاه حبیبي د ۲۰۲۲ کال د اګسټ په لومړیو کې په کابل کې د طالبانو د استخباراتي ادارې له لوري نیول شوی و. طالبان په دې اړه د ازادي راډیو پوښتنو ته ځواب نه ورکوي، خو یوه طالب سرچینه وایي چې حبیبي له دوی سره نه دی.
د امریکا د بهرنیو چارو وزارت د محرمیت او امنیتي ملاحظاتو له کبله د نیول شویو کسانو په اړه معلومات نه شي خپرولی. په ملګرو ملتونو کې د امریکا دایمي استازي مایک والټز ویلي چې امریکا به د طالبانو له خوا د امریکايي وګړو نیول ونه زغمي. هغه د امنیت شورا غړو ته وویل چې طالبان د فشار د وسیلې په توګه بې ګناه خلک نیسي.
موضوع: د امریکايي وګړو ناعادلانه نیونې
سرچینه: Azadi Radio Pashto Reports
