د افغانستان پخوانی ولسمشر حامد کرزی څرګنده کړې چې د طالب چارواکو له اجازې پرته له خپل کوره نهشي وتلی. ښاغلي کرزي دغه څرګندونې د بلومبرګ ورځپانې د مشال حسین پاډکاسټ سره په مرکه کې کړې، چې د جمعې په ورځ، د اګسټ په ۲۱مه خپره شوه.
کرزي د دې پوښتنې په ځواب کې چې "ایا اجازه لرې چې په کابل کې له خپل کوره ووځې؟" وویل: "نه، نه د طالب چارواکو له اجازې پرته له کوره نهشم وتلی. که چېرته ځم او دوی موافقه وکړي، نو بیا مې امنیت نیسي او ملتیا مې کوي." هغه زیاته کړه چې ځینې دوستان او ملګري یې اجازه لري چې لیدو ته یې راشي، خو ځینې بیا اجازه نه لري.
پخواني ولسمشر د طالبانو او پاکستان ترمنځ د اړیکو د ترینګلتیا په اړه هم خبرې وکړې او وویل: "دا شخړې ثابتوي چې پاکستان په افغانستان کې له یوه حکومت سره هم نهشي جوړېدلی." هغه د پاکستان د سیاستونو په اړه اندیښنه وښوده او هیله یې څرګنده کړه چې دا سیاستونه سم شي.
کرزی د طالبانو پر حکومت غږ وکړ چې د نړیوال مشروعیت ترلاسه کولو لپاره باید نجونو ته د زدهکړو او ښځو ته د کار اجازه ورکړي. هغه وویل: "هر کله چې فرصت په لاس راغلی ما له طالبانو غوښتي چې پر ښځو او نجونو بندیزونه لیرې کړي."
هغه د خپلو درې لوڼو یادونه وکړه چې اوس له زدهکړو محرومې دي او څرګنده یې کړه چې د نجونو د زدهکړو حق لپاره مبارزه به هېڅکله نهشي پرېښوده. د طالبانو له واکمنېدو وروسته، نږدې درې میلیونه نجونې له ثانوي زدهکړو محرومې شوې دي، چې دا حالت د نړیوالې ټولنې له خوا په کلکه غندل شوی دی.
موضوع: حامد کرزی د طالبانو د حکومت په اړه څرګندونې
سرچینه: Azadi Radio Pashto Reports
