د امریکا د کانګرس یو شمېر قانون جوړوونکو، امریکايي بانکونو، د بندرونو مسؤلینو او د سونګ توکو د صنعت اړوند ادارو ته خبرداری ورکړی دی چې له روسیې څخه د ډیزلو واردولو په اسانتیا کې له ګډون څخه ډډه وکړي. دوی ویلي چې دا ډول اقدامات ممکن د کانګرس د څېړنو او قانوني تعقیب لامل شي.
دا خبرداری د ولسمشر ډونالد ټرمپ له هغې پرېکړې سره تړاو لري چې له روسیې څخه د سونګ توکو پر واردولو محدودیتونه نرم کړي. قانون جوړوونکو په خپلو لیکونو کې د امریکا د لویو بانکونو اجرائیوي مشرانو او د بندرونو مسؤلینو ته خبرداری ورکړی دی چې له روسیې څخه د ډیزلو واردول ممکن د فدرال قوانینو سرغړونه وي.
دوی همدارنګه ویلي چې د دې وارداتو له لارې روسیې ته عواید برابرېدل د اوکراین پر وړاندې د مسکو د جګړې تمویل ته مرسته کوي، چې دا د امریکا د ملي امنیت په اړه اندېښنې راپاروي. دا اقدام وروسته له هغه شوی چې ولسمشر ټرمپ د روسیې له ولسمشر ولادیمیر پوتین سره د یوې هوکړې خبر ورکړ. په دې هوکړه کې روسیه ژمنه کړې چې امریکا ته سلګونه زره مټریک ټنه ډیزل صادر کړي.
د ازادې اروپا راډیو د راپور له مخې، دغه لیکونه د امریکا د حکومت د پالیسۍ پر سر د سیاسي او حقوقي اختلافونو د یوې نوې جبهې د رامنځته کېدو ښکارندويي کوي. که ډیموکراتان د نومبر په منځمهاله ټاکنو کې د کانګرس د واک بېرته ترلاسه کړي، ښايي د پراخو څېړنو د ترسره کولو واک هم ترلاسه کړي.
د راپورونو له مخې، د روسیې د ډیزلو لېږدوونکې بېړۍ ممکن د اکټوبر له وروستیو ورځو څخه امریکا ته ورسېږي. د دې اختلاف اصلي موضوع دا ده چې ایا د امریکا د حکومت لهخوا د وارداتو لپاره صادر شوی جواز د کانګرس له لوري له لګول شویو محدودیتونو سره سمون لري او که نه؟
موضوع: د روسیې له خوا د ډیزلو واردات
سرچینه: Azadi Radio Pashto Reports
