د تایلنډ پولیسو د دغه هېواد په شمال لوېدیځ کې د «نونتابوري» ولایت په یوه ښوونځي کې د خونړۍ ډزو په اړه تازه معلومات وړاندې کړي. پولیسو ویلي، ۱۴ کلن زدهکوونکی لومړی په خپل کور کې خپل نیکه او نیا وژلي او وروسته ښوونځي ته تللی دی، چیرته چې یې ډزې کړې.
د رویټرز د راپور له مخې، په دې برید کې شپږ کسان وژل شوي او ۱۵ نور ټپیان شوي دي. پولیسو څرګنده کړې چې دغه زدهکوونکی وروسته پر ځان هم ډزې کړې او روغتون ته د انتقال وروسته یې ساه ورکړه. د پولیسو په وینا، هغه له یوې وسلې څخه کار اخیستی چې د خپل نیکه وه، او ۲۶ ډزې یې کړې وې.
د تایلنډ د پوهنې وزیر پراسرت جانتاراروانګتونګ ویلي چې د وژل شویو او ټپیانو په منځ کې ښوونکي او زدهکوونکي هم شامل دي. پولیسو تایید کړې چې بریدګر د همدې ښوونځي زدهکوونکی و. دا پېښه د روان میلادي کال په ترڅ کې په تایلنډ کې دویم وسلهوال برید دی.
د فبرورۍ په میاشت کې، په تایلنډ کې په یوه بل ښوونځي کې د ډزو له امله یو ښوونکی وژل شوی او یو زدهکوونکی ټپي شوی و. په تایلنډ کې د وسلو مالکیت او وسلهوال تاوتریخوالی یوه نادره پدیده نه ده. په تېرو شپږو کلونو کې، دغه هېواد د څو خونړیو ډزو شاهد پاتې شوی، چې په ځینو پېښو کې ماشومان هم قرباني شوي دي.
د تایلنډ په معاصر تاریخ کې تر ټولو خونړۍ ډلهییزه وژنه په ۲۰۲۲ کال کې رامنځته شوه، چیرته چې یوه پخواني پولیس د درې ساعته وسلهوال او چاقو برید پر مهال ۳۶ کسان، چې ۲۲ یې ماشومان وو، ووژل. په ۲۰۲۵ کال کې هم یوه وسلهوال کس د بانکوک په یوه بازار کې پنځه کسان ووژل او وروسته یې پر ځان ډزې وکړې.
سرچینه: روزنامه اطلاعات روز پښتو
