فواد حسین، د عراق د بهرنیو چارو وزیر، په یوه مرکه کې وویل چې د ایران او متحده ایالاتو ترمنځ جګړه د ټولې سیمې پر وضعیت اغیزه کړې او عراق د دې جګړې له امله اقتصادي او امنیتي فشارونو سره مخ دی.
حسین د امریکا د نظامي ماموریت پای ته رسیدل د عراق په سیاسي او حکومتي وضعیت کې "نوې فصل" بللی، خو ټینګار یې وکړ چې د امریکایي ځواکونو وتل د بغداد او واشنګټن اړیکو کې بدلون نه دی راوستی. هغه وویل چې امریکایي ځواکونه له ۲۰۰۳ کال راهیسې په عراق کې موجود وو او وروسته له ۲۰۱۱ کال څخه د داعش د ظهور او امنیتي ګواښونو له امله یو ځل بیا عراق ته راستون شول.
وزیر وویل: "موږ د امریکا او نورو متحدینو سره د داعش د ماتولو لپاره جګړه کړې او د هغوی له ملاتړ څخه مننه کوو. اوس موږ غواړو چې په اقتصادي، انرژۍ او سیاسي برخو کې خپلې اړیکې پیاوړې کړو او د دوه اړخیز امنیتي توافق په اړه خبرې وکړو."
د ایران او امریکا ترمنځ جګړې په اړه، حسین وویل چې د دې بحران حل یوازې د دیپلوماسي او خبرو له لارې ممکن دی. هغه زیاته کړه: "دا جګړه یوازې د ایران پورې محدود نه ده، بلکې عراق هم له دې جګړې زیانمن شوی او په حقیقت کې قرباني دی."
حسین وویل چې د هرمز تنگه د یوې مودې لپاره د عراق د نفتو صادراتو مخه نیولې وه، مګر اوس د نفتو صادرات بیا پیل شوي دي. هغه همدارنګه وویل چې بغداد د دې ستراتیژیکې لارې د امنیتي وضعیت په اړه اندیښمن دی او غواړي چې جګړه پای ته ورسیږي او سوله راشي.
د عراق د بهرنیو چارو وزیر د ایران، امریکا او نورو اړوندو هیوادونو سره د اړیکو په اړه وویل چې ټولې خواوې باید د خبرو له لارې خپلې ستونزې حل کړي. هغه یادونه وکړه چې د ملګرو ملتونو په عمومي غونډه کې د ایران او امریکا ترمنځ خبرې شوې، مګر دا خبرې پای ته نه رسیدلې. حسین ټینګار وکړ چې عراق چمتو دی چې د خبرو د اسانتیا لپاره منځګړیتوب وکړي.
هغه په دې اړه چې آیا د نظامي عملیاتو بیا پیلیدو احتمال شته، وویل: "موږ د جګړې سره موافق نه یو او نه غواړو چې د جګړې برخه شو." حسین زیاته کړه چې د عراق خلک د جګړې پایلې څو لسیزې تجربه کړې او د دې جګړې له امله د هیواد بنسټونه او د عراقیانو ژوند زیانمن شوی دی. له همدې امله، بغداد تل د خبرو او دیپلوماسي له لارې د ستونزو د حل پر اهمیت ټینګار کوي، نه د نظامي حلونو له لارې.
موضوع: عراق د جګړې مخالف دی
سرچینه: Azadi Radio جهان
