روزمري ډيکارلو د طالبانو سره د ښځو او نجونو حقونو په اړه خبرې وکړې

د ملګرو ملتونو د سیاسي او سولې جوړونې مرستیالې روزمري ډيکارلو خپل سفر افغانستان ته پای ته ورساوه. په دې سفر کې هغې له طالبانو، د مدني ټولنې استازو، ښځینه فعالانو او د ملګرو ملتونو له افغان ښځینه کارکوونکو سره لیدنې وکړې.

ملګرو ملتونو په یوه بیان کې چې د سې شنبې په ورځ خپور شو، ویلي چې ډيکارلو د طالبانو سره په خبرو کې د ښځو او نجونو د وضعیت په اړه د ملګرو ملتونو د غړو هېوادونو اندېښنې مطرح کړې، په ځانګړي ډول یې د نجونو د زده کړو پر اهمیت ټینګار وکړ. هغې څرګنده کړه چې د ښځو او نجونو د حقونو پرمختګ د افغانستان د پرمختګ لپاره اړین دی.

ډيکارلو د ملګرو ملتونو له افغان ښځینه کارکوونکو سره د لګېدلو محدودیتونو په اړه هم خبرې وکړې. هغې د دوحې د بهیر د دوام لپاره د ملګرو ملتونو پر ژمنې ټینګار وکړ او وویل چې د نشه‌یي موادو پر ضد مبارزه او د خصوصي سکټور په اړه د دوحې د بهیر په دوو کاري ډلو کې پرمختګ شوی دی.

هغې زیاته کړه چې دا خبرې باید د افغانستان د خلکو لپاره عملي پایلې ولري. روزمري ډيکارلو د افغانستان اقتصادي او ټولنیزې ستونزې، د اقلیم بدلون او طبیعي پېښې هم یادې کړې او څرګنده یې کړه چې ملګري ملتونه له ګاونډیو هېوادونو سره د ستنېدونکو افغانانو مرستې ته چمتو دي.

د دې سفر په ترڅ کې ډيکارلو د مدني ټولنې له استازو او ښځینه فعالانو سره هم لیدنې وکړې او په افغان ټولنه کې یې د هغوی پر مهم رول ټینګار وکړ.

موضوع: د ښځو حقونه په افغانستان کې