د پاکستان حکومت اعلان کړی چې د سترې محکمې هغه پرېکړه به ننګوي چې له مخې یې د پخواني صدراعظم عمران خان د طبي معایناتو لپاره یوه خصوصي روغتون ته انتقال کیږي. د پاکستان د قانون وزیر نذیر تارړ په یوه ویډیويي بیان کې چې د پاکستان دولتي راډیو له لارې خپور شوی، وویل: "دا پرېکړه د قانون په چوکاټ کې نه راځي."
نذیر تارړ زیاته کړه چې حکومت د دې پرېکړې د بیاکتنې لپاره عریضه وړاندې کوي او غواړي چې د عمران خان طبي معاینات په یوه دولتي روغتون کې ترسره شي، نه په یوه خصوصي روغتون کې.
د پاکستان سترې محکمې د سې شنبې په ورځ حکم وکړ چې عمران خان، چې له ۲۰۲۳ کال راهیسې زنداني دی، د روغتیايي معایناتو لپاره باید په اسلام آباد کې د شفا انټرنشنل روغتون ته ولېږدول شي.
د دې پرېکړې له مخې، د عمران خان خور او ډاکټرې، عظمیٰ خان، ته به اجازه ورکړل شي چې د درملنې پر مهال ورسره پاتې شي، او د هغه کورنۍ به په اوونۍ کې یو ځل د لیدو اجازه ولري.
عمران خان او مېرمن یې بشرا بي بي د فساد په یوه قضیه کې د ۱۷ کلونو بند سزا تېروي. عمران خان او د هغه تحریک انصاف ګوند (PTI) ادعا کوي چې پر دوی لګېدلي تورونه سیاسي انګېزه لري. عمران خان، چې پخوانی مشهور کرکټ لوبغاړی دی، له ۲۰۱۸ څخه تر ۲۰۲۲ کال پورې د پاکستان صدراعظم و او لا هم د دغه هېواد تر ټولو اغېزناک مخالف سیاسي مشر بلل کېږي.
موضوع: د عمران خان د روغتون انتقال
سرچینه: Azadi Radio Pashto NEWS
