نړیوال بانک په خپل تازه راپور کې د افغانستان د اګست میاشتې اقتصادي وضعیت ته اشاره کړې او ویلي یې دي چې د طالبانو حکومت لګښتونه د کورنیو عوایدو په پرتله په چټکۍ سره زیات شوي دي. د دې راپور له مخې، د بودجې کسر شاوخوا ۲.۱ میلیارد افغانۍ (نژدې ۳۲.۳ میلیون ډالرو) ته رسېدلی دی. د روان مالي کال ټول دولتي لګښتونه شاوخوا ۱۱۳.۶ میلیارد افغانۍ (د ۱.۷۵ میلیارد ډالرو معادل) ښودل شوي دي.
د امنیتي برخې لګښتونه ۵۱.۳ میلیارد افغانۍ (شاوخوا ۷۸۹ میلیون ډالره) ته رسېدلي چې د حکومت د ټولو لګښتونو ۴۵.۲ سلنه جوړوي. د نړیوال بانک د معلوماتو له مخې، پر زیربناوو او طبیعي سرچینو ۹.۴ میلیارد افغانۍ لګول شوې دي. د افغانستان کلنی انفلاسیون ۶.۷ سلنه بلل شوی، چې د خوراکي توکو انفلاسیون په اووه سلنه کې ثابت پاتې شوی، خو د غیرخوراکي توکو انفلاسیون له ۷.۹ سلنې څخه ۶.۴ سلنې ته راکم شوی دی.
اقتصادي کارپوه اذرخش حافظي د دې راپور په اړه وايي چې د اګست میاشت کې د نړۍ اقتصادي وضعیت د بېلابېلو بحرانونو له امله ښه نه و، خو د افغانستان اقتصادي وضعیت بد نه دی. حافظي زیاتوي چې د انفلاسیون کموالی یوه مثبته ارزونه ده، خو د اقتصادي ودې لپاره اړین مولفات په افغانستان کې نه شته.
نړیوال بانک همدارنګه ویلي چې ایران د افغانستان د بهرنۍ سوداګرۍ تر ټولو لوی شریک دی. د روان مالي کال په ترڅ کې، ایران د افغانستان د صادراتو ۳۱.۱ سلنه او د وارداتو ۳۲.۹ سلنه برخه لري. د اګست په میاشت کې د افغانستان د بهرنۍ سوداګرۍ کچه شاوخوا ۱.۳۴ میلیارد ډالرو ته رسېدلې چې د جولای په پرتله ۱۹ سلنه زیاتوالی ښیي.
د راپور له مخې، د افغانۍ ارزښت د امریکايي ډالر په وړاندې ۱.۱ سلنه لوړ شوی، خو د اقتصادي فعالیتونو د ودې چټکتیا د کمېدو په حال کې ده. د بهرنیو مرستو کمښت او سیمهییزو کړکېچونو د افغانستان اقتصادي فعالیتونه محدود کړي دي.
موضوع: د افغانستان اقتصادي وضعیت او انفلاسیون
سرچینه: Azadi Radio Pashto Reports
