د سعودي عربستان په مشرۍ نظامي ائتلاف د جمعې په ورځ، د لړم ۲۹مه، اعلان وکړ چې د یمن په بندر حدیده کې د حوثي ځواکونو کارول شوي تاسیسات یې هدف ګرځولي دي. په همدې حال کې، حوثي ځواکونو چې د ایران ملاتړ لري، هوایي شرکتونو ته خبرداری ورکړی چې د سعودي عربستان په هوایي حریم کې داخلیدو څخه ډډه وکړي.
ترکی المالکي، د سعودي ائتلاف ویاند، وویل چې د ائتلاف ځواکونو په بندر حدیده کې هغه تاسیسات ویشتلي چې حوثي ځواکونه یې د وسلو د قاچاق او بالستیک راکټونو د لیږد لپاره کاروي. ائتلاف همدارنګه د حوثي ځواکونو د راکټي او بې پیلوټه الوتکو پر تاسیساتو او د صنعا په ښار کې د تدارکاتو یوه زیرمې پر ضد د برید خبر ورکړ.
بندر حدیده د سرخ سمندر په ساحل کې د یمن شمالي برخو ته د ضروري توکو د رسولو تر ټولو مهمه لاره ده. سعودي ائتلاف مخکې له دې چې بریدونه پیل کړي، له غیر نظامیانو غوښتنه کړې وه چې د خپل ژوند د خوندیتوب لپاره بندر ترک کړي. د یمن د سعودي ملاتړ لرونکي حکومت د اطلاع رسونې وزیر ویلي چې بندر حدیده لا هم فعالیت لري او د توکو جریان نه دی دریدلی.
تر اوسه پورې د جمعې د ورځې د بریدونو د زیانونو یا تلفات په اړه هیڅ راپور نه دی خپور شوی. مخکې له دې چې سعودي ائتلاف په بندر حدیده برید وکړي، یحیی سریع، د حوثي ځواکونو ویاند، خبرداری ورکړی و چې که چیرې برید وشي، نو جده او نور بندرونه به د تلافی بریدونو هدف شي.
د سعودي ائتلاف د جمعې په ورځ اعلان وکړ چې د دې ائتلاف د دفاعي ځواکونو دوه بالستیک راکټونه چې د حوثي ځواکونو له خوا د جازان ولایت په لور شلیک شوي و، ونیول او له منځه یې یوړل. د سعودي چارواکو په وینا، د راکټونو د له منځه وړلو ترکشونه په الشقیق سیمه کې راښکته شوي، چې حوثي ځواکونو مخکې تهدید کړی و چې د دې سیمې بریښنا خانه به هدف وګرځوي.
موضوع: د سعودي ائتلاف په یمن کې د حوثي ځواکونو پر تاسیساتو برید
سرچینه: Azadi Radio جهان