د ترکمنستان د ګازو دولتي شرکت «ترکمنګاز» مشر مقصد بابایف اعلان کړی چې هېواد یې په ۲۰۲۶ کال کې د ټاپي نللیکې له لارې افغانستان ته د طبیعي ګازو لېږد شروع کوي. د ترکمنستان رسنیو د چهارشنبې په ورځ خبر ورکړ چې د سرحداباد او هرات ترمنځ د نللیکې جوړولو پروسه روانه ده.
د دې نللیکې د کلنۍ وړتیا ۳۳ میلیارده متر مکعبه ګاز ټاکل شوې ده. بابایف د ټاپي پروژې اهمیت په ګوته کړی او ویلي یې دي چې دا پروژه نه یوازې د انرژۍ د لېږد لپاره مهمه ده، بلکې د سیمهییزو اقتصادي همکاریو د پیاوړتیا لپاره هم اساسي رول لري.
د ترکمنستان او افغانستان د ګازو دولتي شرکتونو ترمنځ د همکارۍ یوه تفاهملیک هم لاسلیک شوی دی چې هدف یې د هرات ته د ګازو لېږد آسانتیاوې برابرول دي. بابایف همداراز د ګازو د صادراتو د لارو پراخولو، د تولیدي ټکنالوژۍ د عصري کولو او د میتان ګازو د خپرېدو د کمولو په برخه کې د هڅو یادونه وکړه.
د ټاپي پروژه د ترکمنستان، افغانستان او پاکستان ترمنځ د ګازو د لېږد یوه مهمه پروژه ګڼل کېږي چې د سیمهییزې همکارۍ او اقتصادي ودې لپاره به مثبتې پایلې ولري. د دې پروژې له لارې به د ګازو د لېږد پروسه اسانه شي او د دواړو هېوادونو ترمنځ اقتصادي اړیکې به لا پیاوړې شي.
موضوع: ترکمنستان د ګازو لېږد افغانستان ته
سرچینه: Azadi Radio Pashto NEWS
