د لیتوانیا د سرحدي ساتنې ادارې (VSAT) ویلي چې د بلاروس څخه لیتوانیا ته د تلو پر مهال ۳۵ افغان او عراقي کډوال نیول شوي دي. دغه ډله د پنجشنبې په ماښام د ورېنا ولسوالۍ د کاتراس کلي په نږدې سیمه کې د سرحد د تیریدو پر مهال کشف شوه.
لیتوانیا چارواکو د کډوالو د موندلو لپاره یوه پراخه عملیات پیل کړل، چې په کې د VSAT هلیکوپټر، سرحدي ساتونکي، ځانګړې ځواکونه او سپي شامل وو. پولیسو هم په دې عملیاتو کې مرسته وکړه. کډوال په څو ډلو ویشل شوي وو، خو تر دې چې د لیتوانیا په ژورو سیمو کې لاړ شي، نیول شوي.
د نیول شویو ۳۵ کسانو ټول نارینه وو چې عمرونه یې د شاوخوا ۲۰ څخه تر ۳۰ کلونو پورې وو. یواځې ۱۱ کسانو د پېژندنې اسناد درلودل، پداسې حال کې چې نور یې هیڅ اسناد نه درلودل. VSAT ویلي چې د انفرادي ارزونو له مخې، د دې ډلې په منځ کې کوم امنیتي ګواښ نه و موندل شوی.
د جمعې په سهار، ۲۹ کډوالو ته د لیتوانیا د قانون له مخې د ننوتلو اجازه نه وه ورکړل شوې او دوی بلاروس ته راستنول شوي. د پنځو نورو کډوالو سره مرکې لا هم روانې وې، پداسې حال کې چې یو بل کډوال د روغتیايي ستونزو له امله د طبي معاینې لپاره یوه روغتون ته وړل شوی و.
د لیتوانیا سرحدي چارواکو ویلي چې د روان کال په ترڅ کې یې ۱۶۶۱ کډوال له بلاروس څخه د غیر قانوني تګ مخه نیولې ده.
موضوع: لیتوانیا کې د کډوالو نیونه
سرچینه: Ariana NEWS
