د افغانستان لپاره د ملګرو ملتونو د مرستندویه ماموریت (یوناما) تایید کړې چې د طالبانو د استخباراتو ادارې لخوا دوه افغان کارکوونکي نیول شوي دي. ملګرو ملتونو د سېشنبې په ورځ فرانس پرېس خبري اژانس ته ویلي چې له دوو ورځو راهیسې دوی د دې کارکوونکو سره د لیدنې اجازه نه لري.
یوناما په یوه بیان کې ویلي چې دغه دوه افغان نارینه کارکوونکي د یکشنبې په ورځ، د اګست په ۹مه، په لویدیځ هرات ولایت کې د طالبانو د استخباراتو د عمومي ریاست د چارواکو له خوا نیول شوي. د طالبانو حکومت تر اوسه په دې اړه کومه رسمي تبصره نه ده کړې.
د ملګرو ملتونو د سرمنشي انتونیو ګوترېش دفتر د دې کارکوونکو د ځانګړي حیثیت د درناوي غوښتنه کړې ده. د ګوترېش مرستیال ویاند فرحان حق ویلي: "موږ ته د هغوی پر ضد د لګېدلو تورونو په اړه معلومات نه دي راکړل شوي او نه هم موږ ته اجازه راکړل شوې چې له هغوی سره ووینو."
فرحان حق زیاته کړه: "موږ له واکمنو چارواکو غوښتنه کوو چې د ملګرو ملتونو او د دغه سازمان د چارواکو حیثیت او مصونیت ته درناوي یقیني کړي." دا پیښه د ملګرو ملتونو لپاره د اندیښنې وړ ده، په ځانګړې توګه په داسې حال کې چې د طالبانو حکومت د نړیوالو سازمانونو او کارکوونکو سره د تعامل په برخه کې د شفافیت او همکارۍ نشتوالی ښیي.
یوناما د افغانستان په اړه د نړیوالو هڅو یوه مهمه برخه ده، او د دې سازمان د کارکوونکو مصونیت د نړیوالو اصولو او قوانینو له مخې باید خوندي وي.
موضوع: یوناما د هرات په ولایت کې د کارکوونکو نیول
سرچینه: Azadi Radio Pashto NEWS
