د طالبانو حکومت په کندهار کې د سمنټو تولید فابریکه پرانیزي. د طالبانو حکومت ویاند ذبیحالله مجاهد د جمعې په ورځ (د لړم/ عقرب اتمه) په خپله اېکسپاڼه کې اعلان وکړ چې دغه فابریکه په اوسنۍ مرحله کې د ورځې ۱،۵۰۰ ټنه سمنټ تولیدوي، او تمه ده چې په راتلونکي کې به د دې تولید کچه ۵،۰۰۰ ټنو ته ورسیږي.
د چارواکو په وینا، د دې فابریکې پرانیسته د سمنټو په برخه کې د ځان بسیاینې لپاره یو مهم ګام دی، چې له دې لارې به زرګونه کسانو ته د کار فرصتونه برابر شي. د راپورونو له مخې، افغانستان هر کال د خپلو انکشافي پروژو لپاره له ۵ تر ۷ میلیون ټنو سمنټو ته اړتیا لري، چې ډېری برخه یې له ګاونډیو هېوادونو څخه واردوي.
د پاکستان سره د سوداګرۍ لارو د تړل کیدو وروسته، په افغانستان کې د سمنټو بیه لوړه شوې، چې دا فابریکه به د دې ستونزې د حل لپاره مرسته وکړي. د سمنټو تولید زیاتول به نه یوازې د بیې د کموالي لامل شي، بلکې د هیواد په اقتصادي پرمختګ کې هم مرسته وکړي.
د طالبانو حکومت د دې فابریکې پرانیسته د افغانستان د اقتصادي پیاوړتیا او د کارموندنې د فرصتونو د زیاتولو په لور یو مثبت ګام ګڼي. د سمنټو تولید د ساختماني پروژو لپاره حیاتي دی، او د دې فابریکې له لارې به د هیواد اړتیاوې په ځايي توګه پوره شي.
موضوع: کندهار کې د سمنټو فابریکې پرانیسته
سرچینه: Azadi Radio Pashto NEWS
