د پکتیکا ولایت اوسېدونکي وایي، د ښځینه متخصصو ډاکټرانو نشتوالی د هغوی لپاره ګڼې ستونزې رامنځته کړې دي. د ۲۱ ولسوالیو لرونکی دې ولایت کې، یوازې د ارګون او خیر کوټ ولسوالیو روغتونونو کې دوه ښځینه متخصصې ډاکترې موجودې دي، پداسې حال کې چې د نورو ۱۹ ولسوالیو روغتیايي مرکزونو کې هیڅ ښځینه متخصصه ډاکتره نشته.
د پکتیکا اوسېدونکې سلیمه، چې د خیر کوټ روغتون ته د ماشوم زېږون لپاره راغلې، وایي چې په دې روغتون کې یوازې یوه ښځینه ډاکتره فعالیت کوي او هغه هم یوازې دوه یا درې ورځې په اوونۍ کې د ناروغانو لپاره حاضرېږي. د هغې په وینا، د ښځینه ناروغانو درملنه د دې نشتوالي له امله له ستونزو سره مخ ده.
سلیمه زیاتوي چې د ناروغۍ په صورت کې، ښځې اړ دي چې د لسګونه کیلومتره واټن په وهلو د ارګون، خیر کوټ یا د خوست او پکتیا ولایتي روغتونونو ته لاړې شي. د دې ترڅنګ، د اقتصادي ستونزو، کلتوري محدودیتونو او د لارو خرابوالي له امله، د پکتیکا د ډېرو ولسوالیو اوسېدونکي له روغتیایي خدماتو بې برخې دي.
ګل رحمن، چې خپله ناروغه مېرمن یې د ارګون روغتون ته راوړې، وایي چې په سیمه کې د ښځینه ډاکټرانو نشتوالی د دې لامل شوی چې د ناروغۍ په صورت کې ښځې له روغتیایي خدماتو بې برخې پاتې شي. هغه همدارنګه د روغتیایي خدماتو د نشتوالي په اړه شکایت کوي.
د خیر کوټ روغتون یوه نرسه، نظیفه، د ناروغانو زیاتوالی او د پرسونل کمښت د روغتیایي خدماتو د وړاندې کولو په برخه کې لوی خنډونه بولي. د هغې په وینا، یوازې یوه ښځینه متخصصه ډاکتره دنده ترسره کوي او د ناروغانو د زیاتوالي له امله، د پکتیکا مرکز ته د ناروغانو لیږد اړین دی.
د یادونې وړ ده چې د ملګرو ملتونو کارپوهانو د طالبانو له خوا د ښځینه ډاکټرانو د فعالیت محدودولو غندنه کړې او دا یې د افغانستان د روغتیايي سیستم لپاره خطرناک بللی دی.
موضوع: د پکتیکا ولایت د ښځینه متخصصو ډاکټرانو کمښت
سرچینه: روزنامه اطلاعات روز پښتو
