د امریکا په ټولو هوايي ډګرونو کې د وتونکو الوتکو الوتنې ودرول شوې دي. د امریکا د فدرالي هوايي چلند ادارې د جمعې په ورځ، د نومبر په ۱۳مه، له غرمې وروسته په خپله اېکسپاڼه کې خبر ورکړی چې د هوايي ترافیک د کنټرول مرکزونو په مخابراتي سیستم کې د یوه تخنیکي ستونزې له امله دغه اقدام شوی دی.
د روېټرز خبري اژانس د راپور له مخې، دا د ۲۰۰۱ کال د سپټمبر د ۱۱مې له بریدونو وروسته دوهم ځل دی چې په امریکا کې د تخنیکي ستونزې له امله د الوتنو فعالیت ودرول کېږي. راپور ښيي چې هغو الوتکو ته چې د دې امر له صادرېدو مخکې په هوا کې وې، اجازه ورکړل شوه چې په خپلو ټاکلو ځایونو کې کښته شي، خو هغو الوتکو ته چې په هوايي ډګرونو کې پر ځمکه وې، د الوتنې اجازه ورنهکړل شوه.
د الوتنو د څارنې بنسټ، فلایټاوېر، ویلي چې د دې ستونزې له امله نږدې اووه زره الوتنې یا خو ځنډېدلې او یا لغوه شوې دي. د امریکا د ترانسپورټ وزیر، شان ډافي، په اېکس ټولنیزه شبکه کې په یوه پیغام کې ویلي چې د فدرالي هوايي چلند ادارې د مخابراتي ستونزې له رامنځته کېدو وروسته دغه امر صادر کړی دی.
نوموړي زیاته کړې چې دا ستونزه د هوايي تګ راتګ د ټولو کنټرول مرکزونو فعالیت اغېزمن کړی دی. هغه وویل چې د دې ادارې تخنیکي کارکوونکي د ستونزې په حل کې بوخت دي او د نوي معلوماتو له ترلاسه کولو سره به یې له خلکو سره شریک کړي.
روېټرز همدارنګه راپور ورکړی چې د هوايي شرکتونو چارواکو ویلي، د امریکا د فدرالي هوايي چلند ادارې د الوتنو د درولو د امر د لغوه کېدو لپاره کومه مشخصه نېټه او وخت نهدی اعلان کړی، خو لومړنۍ نښې ښيي چې په ځینو سیمو کې مخابراتي ستونزې د ښه کېدو په حال کې دي.
موضوع: د امریکا د فدرالي هوايي چلند ادارې الوتنې ودرول
سرچینه: Azadi Radio Pashto Reports
