اسکات بسنت، د امریکا د خزانهدارۍ وزیر، د ایران پر اقتصادي فشارونو خبرې کړي او دا یې مؤثر بللي دي. هغه په «سیانبیسی» ټلویزیوني شبکې کې وویل چې د ایران پر اقتصادي فشارونو دوام د دې هېواد لپاره مثبت پایلې درلودلي او د امریکا د ډالرو محدود لاسرسی د دې سبب شوی چې تهران د خپلو نیابتي ډلو لپاره مالي ملاتړ کم کړي.
بسنت زیاته کړه چې دغه فشارونه ممکن د یوه کال په موده کې د ایران اقتصاد ۲۵ سلنه کمزوری کړي. د هغه په وینا، د ایران چارواکي په دې کال کې د خپلې اقتصادي وضعیت په اړه څرګندې اندیښنې څرګندې کړي دي. هغه وویل: "د سپاه پاسداران ځواکونه په کلکه اندیښمن دي او په خصوصي او عامه غونډو کې د ایران د اقتصاد د ړنګیدو په اړه خپلې اندیښنې څرګندوي."
بسنت همدارنګه وویل چې ایران اړ شوی چې د یمن حوثي او د لبنان حزبالله لپاره مالي ملاتړ کم کړي. د ډونالډ ترمپ حکومت په وروستیو میاشتو کې د ایران پر وړاندې یو لړ اقتصادي اقدامات پیل کړي، چې په کې د سمندري محاصرې، د ایراني بانکونو پر ضد بندیزونه، د ایران مالي سرچینو محدودول او د دې هېواد د نفتو عایداتو باندې محدودیتونه شامل دي.
د امریکا د خزانهدارۍ وزارت د روان کال د اګست په میاشت کې دغه اقدامات د «ایران اقتصادي انزوا» په نوم پیل کړل. په مقابل کې، د ایران چارواکي د دې فشارونو د اغیزو په اړه ادعاوې ردوي او وایي چې ایران د دې ډول اقداماتو په وړاندې مخکې له مخکې چمتووالی درلود.
تېرې اوونۍ، عبدالناصر همتي، د ایران د مرکزي بانک رئیس، ادعا وکړه چې ایران کافي ارزي ذخیرې لري ترڅو د وارداتو لګښتونه د ترمپ د ریاست تر پای پورې پوره کړي. هغه د ایران د مرکزي بانک د ارزي ذخیرې وضعیت ښه بللی، خو د دې ذخیرې دقیق مقدار یې نه دی څرګند کړی. دا څرګندونې په داسې حال کې شوې چې په وروستیو کې د ایران د خارجي اسعارو لاسرسی کمیدو او د وارداتو کمیدو راپورونه خپاره شوي دي. مسعود پزشکیان، د ایران رئیس جمهور، هم مخکې منلې وه چې اقتصادي فشارونه د دې هېواد تجارت شاوخوا ۳۵ سلنه کم کړی دی. د هغه په وینا، دغه فشارونه د ایران پر وارداتو او صادراتو تر ټولو زیات منفي اغیز کړی دی.
موضوع: د ایران پر اقتصادي فشارونو اغیزې
سرچینه: Azadi Radio جهان
