د بشري حقونو فعاله زهره وندا د "افغانان د مخ په ودې تفکر لپاره" په نوم د نادولتي موسسې له خوا د ۲۰۲۶ او ۲۰۲۷ کلونو لپاره د "ملګرو ملتونو په سازمان کې د افغانستان ځوانان" د مدني پروګرام نوې استازې په توګه ټاکل شوې ده. دا خبر د جمعې په ورځ، د لړم په ۱۵مه، د موسسې له لوري په رسمي ایکسپاڼه کې خپور شو.
زهره وندا له دریو نورو نوماندانو سره تر سیالۍ وروسته د داورانو د رایو پر بنسټ دې دندې ته غوره شوې ده. ثریا دلیل، چې د افغانستان پخوانۍ سفیرې او د دې پروګرام د داورانو د پلاوي غړې ده، د شنبې په ورځ، د لړم په ۱۶مه، پر خپله ایکسپاڼه لیکلي چې د افغانستان د راتلونکي په اړه بحثونه باید د ځوانانو د ګډون پرته ترسره نه شي.
دا دنده په ملګرو ملتونو کې کوم رسمي ډیپلوماتیک مقام نه دی، بلکې د یوې مدني ټولنې خپلواک نوښت دی چې ځوانانو ته د ملګرو ملتونو په غونډو کې د وینا کولو او د خپلو حقونو د غوښتلو زمینه برابروي. زهره وندا د طالبانو له بیا واکمنېدو وروسته اروپا ته کډواله شوې او د افغان کډوالو د بشري حقونو او د ښځو د حقونو په برخه کې فعالیت کوي.
د "افغانان د مخ په ودې تفکر لپاره" بنسټ د زهره وندا ټاکنه د افغان ښځو او ځوانانو د غږ رسولو او د هغوی د غوښتنو او اندېښنو د مطرح کولو لپاره یو مهم فرصت ګڼي. د "ملګرو ملتونو په سازمان کې د افغانستان ځوانان" مدني پروګرام په ۲۰۱۸ کال کې پیل شوی، چې هدف یې د افغان ځوانانو غږ په نړیوالو بحثونو کې اورېدل دي. هر کال یو افغان ځوان، چې غوره ګڼل کېږي، د استازي په توګه ټاکل کېږي ترڅو د افغانستان د ځوانانو، په ځانګړي ډول د ښځو او نجونو، نظرونه او غوښتنې مطرح کړي.
موضوع: زهره وندا د ملګرو ملتونو د مدني پروګرام استازې ټاکل
سرچینه: Azadi Radio Pashto NEWS
