مالیزیا د هوا د شدید ککړتیا له امله، په پلازمېنه کوالالمپور او نورو سیمو کې ښوونځي بند کړي دي. دا ککړتیا د ګاونډي هیواد اندونیزیا کې د اورلګېدنو له امله رامنځته شوې ده.
د فرانسې خبري آژانس د راپور له مخې، د مالیزیا د پوهنې وزارت اعلان کړی چې په څلورو ایالتونو او دوو فدرالي سیمو کې ټول ښوونځي په بشپړه توګه او په پاهانګ ایالت کې په یوه برخه کې جزوي ډول تړل شوي دي. د ځنګلونو د اورلګېدنو لوګي له یوې میاشتې راهیسې د سیمې ښارونه نیولي او د تنفسي ناروغیو د زیاتېدو سبب شوي دي.
د جمعې په ورځ، د تلې پر ۱۷مه، په کوالالمپور کې د هوا د ککړتیا شاخص شاوخوا ۱۷۰ ته رسیدلی و، چې له سنګاپور وروسته دغه ښار د نړۍ دویم تر ټولو ککړ ښار وپېژندل شو.
د مالیزیا صدراعظم انور ابراهیم وویل، چې د اورلګېدنو د وضعیت په اړه یې د اندونیزیا له ولسمشر پرابوو سوبیانتو سره خبرې کړې او د اشین د سازمان د غړو هیوادونو د چاپیریال وزیرانو د بېړنۍ غونډې غوښتنه کړې ده.
د مالیزیا د معیارونو له مخې، د هوا د ککړتیا شاخص تر ۱۰۰ پورې ناسالم، تر ۲۰۰ پورې ډیر ناسالم او تر ۳۰۰ پورې خطرناک ګڼل کیږي. دا وضعیت د خلکو د روغتیا لپاره جدي خطرونه رامنځته کوي او د حکومت د اقداماتو اړتیا ته اشاره کوي.
موضوع: مالیزیا کې د هوا ککړتیا
سرچینه: Azadi Radio Pashto NEWS
