د نړیوال کرکټ ۲۱ پخوانیو لوبډلمشرانو، چې په کې د هند مشهورو لوبغاړو سنیل ګواسکر او کپل دیو هم شامل دي، د پاکستان حکومت ته یوه لیک استولی دی چې پکې د پخواني صدراعظم عمران خان روغتیا ته د پاملرنې غوښتنه شوې ده.
عمران خان، چې عمر یې ۷۲ کاله دی، له ۲۰۲۳ کال راهیسې په زندان کې دی. تیره اونۍ، د پاکستان د سترې محکمې د حکم له مخې، هغه په اسلام آباد کې د شفا انټرنیشنل روغتون ته د درملنې لپاره لیږدول شوی و، خو د جمعې په ورځ بیرته زندان ته راستون شو.
د کرکټ دغو پخوانیو لوبډلمشرانو په لیک کې درې مهمې غوښتنې مطرح کړي دي. لومړی، دوی غوښتنه کړې چې د سترې محکمې لخوا ټاکل شوی طبي پلاوی دې اجازه ولري چې د عمران خان د روغتیا په اړه بشپړه او خپلواکه ارزونه وکړي، په ځانګړي ډول د هغه د ښۍ سترګې د لید د له لاسه ورکولو په اړه راپورونه وڅیړي.
دویمه غوښتنه دا ده چې د محکمې د پریکړې له مخې، د عمران خان کورنۍ ته دې اجازه ورکړل شي چې له کوم خنډ او ځنډ پرته په اونۍ کې د هغه لیدو ته ورشي.
وروستۍ غوښتنه دا ده چې د طبي ارزونې وروسته، د عمران خان د اړتیا وړ درملنه باید بې له ځنډه ترسره شي. دا غوښتنې د یکشنبې په ورځ استول شوې دي او د کرکټ د دې پخوانیو لوبډلمشرانو له خوا د عمران خان د روغتیا په اړه د اندیښنې څرګندونه کوي.
موضوع: د عمران خان د روغتیا لپاره د پاملرنې غوښتنه
سرچینه: Azadi Radio Pashto NEWS
