د طالبانو د بېرته واک ته رسېدو پنځمې کلیزې په مناسبت، د بې سرحده خبریالانو سازمان خبر ورکړی چې طالبانو تر اوسه د رسنیو د ازادۍ د له منځه وړلو لپاره له ۲۰ زیاتې لارښوونې ترتیب کړې دي. دغه سازمان د افغانستان وضعیت د "اطلاعاتي زندان" په توګه توصیف کړی دی.
د بې سرحده خبریالانو سازمان په یوه اعلامیه کې ویلي چې په افغانستان کې د ژورنالیزم فعالیتونه د زیات فشار سره مخ دي. د طالبانو حکومت د نیوکو مخه نیسي، ښځې له ګڼو محدودیتونو سره مخ دي، او سیاسي بحثونه په بشپړه توګه بند شوي دي. همدارنګه، د ژوندیو موجوداتو د انځورونو خپرول هم منع دي.
د دې سازمان په وینا، د طالبانو د محکمو اصولنامه په ښکاره ډول د مطبوعاتو یادونه نه کوي، خو عملاً هر ډول نیوکه د جرم په توګه ګڼل کېږي. د دې اصولو له مخې، د طالبانو مشر ته د توهین لپاره د درو وهلو او شپږ میاشتې بند سزا ټاکل شوې ده.
سلیا مرسیه، چې د جنوبي اسیا د راپور ورکوونکو له بې پولې سازمان سره کار کوي، ویلي چې طالبانو په تیرو پنځو کلونو کې افغانستان د معلوماتو پر زندان بدل کړی دی. هغې زیاته کړې چې هره نوې لارښوونه د خبریالانو او خپلواکو رسنیو فعالیتونه لا محدودوي.
مرسیه ټینګار کړی چې د نیوکې بندیز او سانسور اوس په رسمي توګه په قوانینو کې ځای پر ځای شوي دي. د هغې په وینا، ښځینه خبریالانې نږدې په بشپړه توګه له رسنیزې صحنې حذف شوې، او هر خپلواک غږ د تعقیب سره مخ دی.
د بې سرحده خبریالانو سازمان د هغو ټولو مقرراتو د لغوه کولو غوښتنه کړې چې د مطبوعاتو ازادي محدودوي. دغه سازمان همداراز ویلي چې سلګونه افغان خبریالان د ځپنې له امله له افغانستانه تښتېدلي دي.
موضوع: طالبانو د رسنیو د ازادۍ محدودول
سرچینه: روزنامه اطلاعات روز پښتو
