د سعودي عربستان د نفتو شرکت آرامکو په ظهران ښار کې د خپل مرکزي ساختمان تخلیه کولو امر کړی دی. دا اقدام وروسته له هغه ترسره شو چې د دمام په هوایي ډګر باندې مرګونی برید وشو او د سعودي عربستان د نظامي او نفتی تاسیساتو پر وړاندې د نوو حملو راپورونه خپاره شول.
د رویترز خبري اژانس د پنجشنبې په ورځ، د ۳۰ مې میاشتې، د شپږو باخبره سرچینو په حواله راپور ورکړ چې د آرامکو مرکزي ساختمان کارکوونکو ته ویلي شوي چې ساختمان تخلیه کړي او خپل فعالیتونه له لیرې څخه ترسره کړي. د دې امر دقیق دلیل لا هم روښانه نه دی او آرامکو د رویترز د تبصرې غوښتنې ته ځواب نه دی ویلی.
دا لومړی ځل دی چې د ایران د جګړې له پیل راهیسې، چې په ۹ حوت کې پیل شوه، د آرامکو مرکزي ساختمان تخلیه کولو امر صادر شوی دی. حوثيانو، چې د ایران د اسلامي جمهوریت له خوا ملاتړ کیږي، د دې میاشتې په پیل کې هم د آرامکو مرکزي ساختمان باندې برید کړی و، چې له امله یې په څو پوړونو کې اور ولګېد او پراخ زیانونه رامنځته شول.
د آرامکو مرکزي ساختمان تخلیه کولو خبر د سعودي عربستان د بورس د اصلي شاخص په ۲.۵ سلنه کموالي سره مل و. د جګړو د زیاتیدو سره، د نړیوالو بازارونو کې د نفتو بیې هم د می میاشتې تر ټولو لوړې کچې ته ورسېدې. د برنت نفتو بیه د ۲.۸۱ سلنه زیاتوالي سره ۱۱۱ ډالرو او ۸۸ سنتو ته ورسیده.
د حوثيانو نظامي ویاند یحیی سریع ادعا کړې چې د سعودي عربستان حملې په یمن کې له جولای میاشتې راهیسې ۵۶۲ کسان وژل او ټپیان کړي دي، چې دا ارقام په خپلواکه توګه تایید شوي نه دي. دا ټولې پیښې وروسته له هغه رامنځته شوې چې د حوثيانو لخوا د چهارشنبې په شپه، د ۲۹ مې په ورځ، د دمام په نړیوال هوایي ډګر باندې برید وشو، چې له امله یې دوه کسان وژل شوي او اته نور ټپیان شوي دي.
د سعودي چارواکو په وینا، په دې برید کې یو سعودي او یو هندي وګړی وژل شوي او د هوایي ډګر تاسیسات هم زیانمن شوي. دا د دمام هوایي ډګر ته په دوه اونیو کې دویم برید دی. د سعودي هوایي سازمان د پنجشنبې په ورځ اعلان وکړ چې د هوایي ډګر فعالیتونه بیا پیل شوي او پروازونه عادي حالت ته راستون شوي دي.
موضوع: د آرامکو مرکزي ساختمان تخلیه
سرچینه: Azadi Radio گزارش ها
