د تاجکستان امنیتي چارواکو په تازه څرګندونو کې ویلي چې د افغانستان سره پر ګډه پوله د یوې وسلهوالې نښتې په ترڅ کې دوه افغان قاچاقبران وژل شوي دي. تر اوسه پورې طالبانو په دې اړه کومه تبصره نه ده کړې.
د تاجکستان د ملي امنیت دولتي کمېټې په خپور شوي بیان کې څرګنده شوې چې دغه قاچاقبران د کندز ولایت د امام صاحب ولسوالۍ اوسېدونکي وو، چې له تاجکستاني سرحدي ځواکونو سره په نښته کې وژل شوي دي. نښته د جیحون په فتحاباد سیمه کې شوې ده.
د بیان له مخې، د نښتې په ځای کې له وژل شوو قاچاقبرانو سره یو میل کلاشینکف، یو میل تفنګچه او ۱۷ کیلوګرامه چرس هم موندل شوي دي. تاجکستاني چارواکي زیاتوي چې د روان کال په لومړیو شپږو میاشتو کې د نشهيي توکو قاچاقبرانو سره په ۷ وسلهوالو نښتو کې ۱۷ افغانان وژل شوي او ۶۰۱ کیلوګرامه مخدره توکي ضبط شوي دي.
تاجکستان له افغانستان سره نږدې زر کیلومتره ګډه پوله لري، چې د نشهيي توکو د قاچاق لپاره یوه له مهمو لارو ګڼل کېږي. د دې هېواد امنیتي ځواکونه د قاچاقبرانو پر ضد د عملیاتو په لړ کې د سختو نښتو سره مخ دي، چې هدف یې د نشهيي توکو د قاچاق مخنیوی دی.
د تاجکستان چارواکي په دې باور دي چې د دې ډول نښتو له لارې به د قاچاقي فعالیتونو مخه ونیسي او د امنیتي وضعیت ښه کولو هڅه وکړي.
موضوع: تاجکستان کې د افغان قاچاقبرانو وژل
سرچینه: Azadi Radio Pashto NEWS
