د بلجیم د پناه غوښتنې او کډوالۍ وزیره انیلین وان بوسویت ویلي چې افغانان چې په جرمونو کې ښکیل دي، افغانستان ته به دېپورټ شي. د "وي ار ټي نیوز" په حواله، دغه کډوال به د خپلو سزاګانو له بشپړولو وروسته بیرته خپلو هېوادونو ته واستول شي. هغې زیاته کړه چې د طالبانو سره تعامل یوازې تخنیکي همکاري ده او د دې حکومت ملاتړ نه ګڼل کیږي.
د شنبې په ورځ، د جرمني په مونیخ ښار کې د بلجیم، فرانسې، پولنډ، ډنمارک، اتریش او چک جمهوریت چارواکو د افغانانو په ګډون د مجرمینو د ستنولو په اړه خبرې وکړې. د بلجیم د پناه غوښتنې وزیرې په یوه بیان کې وویل چې ټول اروپايي هېوادونه پلان لري چې نه یوازې مجرمین، بلکې هغه کډوال هم چې د پناه غوښتنې قضیې یې رد شوي، بیرته واستوي.
بوسویت افغان کډوالو ته خبرداری ورکړی چې په اروپايي ټولنه کې راتلونکی نه لري او اخراج یوازینی حل دی. د بلجیم په بروکسل کې میشت افغان احمدالله حبیبي وویل چې په وروستیو کې د افغانانو پر کډوالو فشارونه زیات شوي دي. هغه وویل، "ډیر افغانان په بلجیم کې په جرمونو کې ښکیل دي او د قانوني اجازې پرته کارونه کوي."
احمدالله د افغان ځوانانو ترمنځ د جنګونو او د کورنیو فشارونو یادونه وکړه چې د دې کډوالو د دېپورټ لامل ګرځي. هغه همدارنګه وویل چې د کډوالو لپاره د سرپناه په کمپونو کې کمښت راغلی دی.
بلجیم د زرهاوو افغان کډوالو کوربه دی، خو د احمدالله په وینا، د کډوالو امتیازات په وروستیو کې کم شوي او د افغان کډوالو نژدې اتیا سلنه د پناه غوښتنې قضیې رد کیږي. جرمني هم په وروستیو کې د افغان مجرمینو د دېپورټ لپاره اقدامات کړي دي.
موضوع: بلجیم افغان مجرمین د دېپورټ لپاره چمتو کوي
سرچینه: Azadi Radio Pashto Reports
