د «افغان ایواک» ادارې په وینا، د امریکا سنای مجلس د افغان متحدانو د ملاتړ لپاره "د افغانستان موقتي ساتنې لایحه" وړاندې کړې ده. په دې اعلامیه کې ویل شوي چې دغه لایحه د امریکا د جمهوري غوښتونکو او دموکراتو سناتورانو له خوا په ګډه وړاندې شوې ده.
«افغان ایواک» زیاتوي چې دغه لایحه به افغانستان ته تر ۲۰۲۹ کال د جولای تر لومړۍ نېټې موقتي ساتنه ورکړي، چې له دې سره افغانان چې په امریکا کې شتون لري، د اخراج په وړاندې ملاتړ او د کار کولو حق بیا احیا کیږي. د دې ادارې په خبره، دغه پروګرام افغانانو ته اجازه ورکوي چې په امنیت کې پاتې شي، تر څو د دایمي اقامت لپاره د خپلې وړتیا له مخې پروسې تعقیب کړي، که دا پروسه د پناهندګۍ، ځانګړې مهاجرت ویزې (اسآیوی) یا د کورنۍ غوښتنلیک وي.
«افغان ایواک» همدارنګه څرګنده کړې چې دغه طرحه محدودې غوښتنې لري، چې د بایومتریک معلوماتو ثبت او امنیتي او ملي امنیتي پلټنې ته اړتیا لري، او دا د افغان متحدانو د ساتنې او د هغوی د کار حق د خوندي کولو لپاره تر ټولو چټک لاره ده.
د دې ادارې په اعلامیه کې ویل شوي چې "دا لایحه دې کورنیو ته اجازه ورکوي چې تر هغې پورې چې د هغوی د مهاجرت دوسیې پروسې ته داخلېږي او بشپړېږي، په ارامه ژوند وکړي او د امریکایي خوب په لټه کې وي؛ پر ځای د دې چې د نیول کیدو یا اخراج د تلپاتې ویرې سره ژوند وکړي، حتی د ډاکټر لیدو، د کور کرایه کولو یا د خپلو ماشومانو ښوونځي ته وړلو پر مهال."
«افغان ایواک» د امریکا سناتورانو څخه غوښتنه کړې چې دغه طرحه بې له ځنډه تصویب کړي. د دې ادارې په وینا، هیڅ بل اقدام چې کانګریس کولی شي په دې کال کې تصویب کړي، د هغو کسانو د امنیت په اړه چې د امریکا سره ولاړ وو، زیات اغیز نلري. د طالبانو د بیا واکمنېدو وروسته، شاوخوا ۱۲۰ زره افغانان چې زیاتره یې د امریکایي ځواکونو او ادارو پخواني همکاران وو، امریکا ته انتقال شوي دي. سره له دې، د دوی د اقامت وضعیت د دونالد ټرمپ د سختو مهاجرتي سیاستونو له امله د ابهام سره مخ دی.
سرچینه: روزنامه اطلاعات روز
