پاکستان د عباس عراقچي څخه غوښتنه کړې چې اسلام آباد ته سفر وکړي. د ایران رسنیو د دوشنبې په ورځ، د اسد په ۱۲ مه، راپور ورکړی چې د ایران او پاکستان د بهرنیو چارو وزیرانو د سیمه ییزو او نړیوالو مهمو تحولاتو په اړه ټیلیفوني خبرې کړې دي. پاکستان په رسمي توګه د عباس عراقچي، د ایران د بهرنیو چارو وزیر، څخه غوښتنه کړې چې په نږدې وخت کې اسلام آباد ته سفر وکړي.
د راپورونو له مخې، د دواړو هېوادونو وزیرانو د سیمې وروستۍ تحولاتو او روانې دیپلماسي پروسې په اړه خبرې کړې او د سولې او ثبات د ټینګښت لپاره د نږدې همکارۍ او مشورو پر اهمیت ټینګار کړی دی. په دې راپور کې ویل شوي چې اسحاق دار، د پاکستان د بهرنیو چارو وزیر، په دې ټیلیفوني خبرو کې په رسمي توګه له عباس عراقچي څخه غوښتنه کړې چې په مناسب وخت کې اسلام آباد ته سفر وکړي.
د ایران د بهرنیو چارو وزیر اوس مهال په عراق کې دی. تر دې دمه د دې بلنې اصلی علت په اړه کوم جزئیات نه دي خپاره شوي. د متحده ایالاتو ولسمشر دونالد ترمپ، چې مخکې یې ویلي و چې د ایران پر ضد پلان شوې پراخه حمله لغوه کړې ترڅو دیپلماسي ته بل فرصت ورکړي، خبریالانو ته ویلي چې د تهران او واشنګټن ترمنځ د توافق لپاره خبرې د دوشنبې په ورځ پیل شي. مګر تهران د دوشنبې په ورځ د دې خبرو د ترسره کیدو راپورونه رد کړي دي.
سرچینه: Azadi Radio جهان
