د ناروې د کډوالو شورا (NRC) عمومي منشي جان ایګلند ویلي، چې د پاکستان څخه راستنېدونکي ګڼ شمېر افغان کورنۍ افغانستان ته د لږو توکو سره راځي. ایګلند دغه څرګندونې د افغانستان د وروستۍ سفر په ترڅ کې وکړې، چې په کې یې له هغو کورنیو سره ولیدل چې له پاکستان څخه راستنېدلي دي.
ایګلند په X کې د خپور شوي پیغام په ترڅ کې وویل، چې ډېری راستنېدونکي د افغانستان په لور د هیڅ شی پرته راځي. هغه زیاته کړه، چې د ځینو مېرمنو سره یې هم لیدلي، چې د خپلو ماشومانو د بنسټیزو اړتیاوو پوره کولو کې له ستونزو سره مخ دي او د خپلو لورونو د زده کړو لپاره فرصتونه لټوي.
د NRC مشر د بشري مرستو د کمیدو او د دې ادارې د فعالیتونو لپاره د تمویل د کموالي په اړه اندیښنه څرګنده کړه. ایګلند وویل، سره له دې چې د افغانستان په کچه بشري اړتیاوې پراخې دي، د ناروې د کډوالو شورا بشري فعالیتونه د مالي سرچینو د کموالي له امله سخت محدود شوي دي.
دا اندیښنه په داسې حال کې مطرح کیږي چې بشري سازمانونه د افغانانو د زیانمنو کورنیو ملاتړ لپاره د محدودو تمویلونو او د اړتیاوو د زیاتیدو په منځ کې د زیات فشار سره مخ دي. ایګلند د بشري مرستو د کمیدو او د تمویل د کموالي په اړه د اندیښنې په ترڅ کې وویل، چې د دې وضعیت د ښه کولو لپاره باید جدي ګامونه واخیستل شي.
موضوع: افغان کډوال له پاکستان څخه راستنېدل
سرچینه: Ariana NEWS
