یوناما: د طالبانو د امنیتي ادارو په څارنه کې نیمګړتیاوې موجودې دي

د افغانستان لپاره د ملګروملتونو مرستندویه ماموریت (یوناما) وایي چې د طالبانو حکومت له ۲۰۲۱ کال د اګسټ میاشتې راهیسې د امنیتي ادارو په څارنه او حساب ورکولو کې هڅې کړي، خو لا هم د روڼوالي او اقداماتو په برخه کې ځینې نیمګړتیاوې شته.

یوناما د اګسټ په لسمه نېټه په یوه ۳۸ مخیز راپور کې څرګندوي چې د طالبانو چارواکو د امنیتي پرسونل د ناوړه چلندونو په اړه نیونې او تحقیقات ترسره کړي، خو د دې تر څنګ لا هم ګڼ شمېر شکایتونه حل شوي نه دي.

د یوناما سرپرستې جورجېټ ګانیون په وینا، د خلکو له خوا ثبت شوي شکایتونه او د ترسره شویو څېړنو په اړه د عامه معلوماتو محدودیت د خلکو پر باور منفي اغېز کوي او د سرغړونو د مخنیوي هڅې کمزورې کوي. هغې زیاته کړه چې د حساب ورکونې بهبود د طالبانو د حکومت قانوني مکلفیت دی او د بشري حقونو د درناوي لپاره یو مهم ګام دی.

راپور څرګندوي چې د غچ اخیستنې له ویرې او د خلکو د باور نشتوالي له امله، په ځانګړې توګه د ښځو لپاره چې له ګڼو محدودیتونو سره مخ دي، د ادعا شویو ناوړه چلندونو راپور ورکول ستونزمن شوي دي.

یوناما د طالبانو حکومت ته سپارښتنه کوي چې په ټولو امنیتي ادارو کې د حساب ورکولو پروسې پیاوړې کړي، ترڅو روښانه قواعد او طرزالعملونه د نړیوالو معیارونو سره سمون ولري. دا باید د ټولو کارکونکو لپاره په مساوي ډول پلي شي، چې په دې کې د ځواک د کارولو، نیولو، توقیف او د لاریونونو کنټرول اصول شامل دي.

موضوع: د طالبانو امنیتي ادارو کې د روڼوالي کمښت