د افغانستان لپاره د ملګرو ملتونو مرستندویه پلاوی، یوناما، په خپل تازه راپور کې ویلي چې د طالبانو د امر بالمعروف او نهی عن المنکر وزارت محتسبینو په تېرو درې میاشتو کې د نامناسب حجاب په تور تر ۵۰ زیاتې ښځې نیولي او توقیف کړې دي. دا راپور د اکټوبر په ۱۵مه خپور شوی دی، چې په کې د روان کال له جولای تر سپټمبر پورې د طالبانو لهخوا پر ښځو محدودیتونه مستند شوي دي.
یوناما په دې راپور کې څرګندوي چې نیول شوې ښځې په عمده توګه په هرات، کابل او بدخشان ولایتونو کې دي. راپور کې ویل شوي چې د طالبانو محتسبینو په ځینو ولایتونو کې ښځو ته خبرداری ورکړی دی چې که بې برقعې یا محرمه له کوره راووځي، نو وبهوهل شي.
د یوناما راپور داسې مهال خپریږي چې ځینې افغان مېرمنې له ازادي راډیو سره په خبرو کې د طالبانو له لوري د نیولو او زنداني کېدو په اړه خبرې کوي. یوه ښځه چې د کابل اوسېدونکې ده، ویلي چې د طالبانو د محتسبینو له لوري نیول شوې او زنداني شوې ده. هغې ویلي چې د امنیتي دلایلو له کبله نه غواړي نوم یې په راپور کې ذکر شي.
د طالبانو حکومت د یوناما پر راپور نیوکه کړې او د ځینو نیونو د نافذه قوانینو له مخې د سرغړونو د مخنیوي او اصلاح لپاره بللي دي. ذبیحالله مجاهد، د طالبانو حکومت ویاند، یوناما د پروپاګند کوونکې ادارې په توګه یاد کړې او تور یې لګولی چې د طالبانو د مرستو او پروګرامونو په اړه ناسم انځور وړاندې کوي.
یوناما په خپل راپور کې د طالبانو د حکومت د امر بالمعروف وزارت لهخوا د افغان ښځو او سړیو د خپلسري نیونو او توقیف ۴۴۳ پېښې مستندې کړې دي. د دې ترڅنګ، د ناوړه چلند لږترلږه ۹۷ پېښې هم ثبت شوي دي. طالبانو د واکمنېدو راهیسې پر ښځو ګڼ شمېر محدودیتونه وضع کړي، چې له شپږم ټولګي پورته نجونو ته د زدهکړو اجازه نه ورکوي.
موضوع: طالبانو د حجاب په تور ښځې نیولي
سرچینه: Azadi Radio Pashto Reports
