د ایران د انرژۍ وزیر عباس عليابادي پرون چهارشنبه کابل ته سفر وکړ، چې دا سفر د ایران د سوداګرو او پانګهوالو ۱۸۰ کسیز پلاوي له سفر یوه ورځ وروسته ترسره شو. دغه پلاوی د ابوحنیفه په نوم نندارتون کې د ګډون لپاره کابل ته تللی و. په دې اوونۍ کې د ایران د پارلمان یو اقتصادي پلاوی هم کابل ته سفر کړی، چې مشري یې محسن زنګینه کوي. هدف یې د افغانستان او ایران ترمنځ د سوداګریزو او اقتصادي اړیکو پراختیا ده.
د دې سفرونو په ترڅ کې د ایران او طالبانو تر واک لاندې افغانستان ترمنځ اړیکو کې تودوالی لیدل کیږي. د ایران د انرژۍ وزارت ویلي، عباس عليابادي به په کابل کې له طالب چارواکو سره رسمي ملاقاتونه وکړي او د امام ابوحنیفه پنځم نړیوال نندارتون کې ګډون وکړي.
د افغانستان د صنعت او پانګونې خونې غړی خانجان الکوزی وايي، د پاکستان سره د افغانستان د اړیکو خرابیدل او د لارو بندیدل د دې سبب شوي چې د افغانستان او ایران ترمنځ سوداګري زیاته شي. هغه څرګندوي چې اوس د خوراکي توکو واردات له ایرانه ترسره کیږي، چې له دې کبله د تجارت کچه تر څلور میلیارده ډالرو ته رسېدلې ده.
الکوزی زیاتوي چې د افغانستان له لوري هم مختلف محصولات لکه زیره او طبي بوټي ایران ته صادر کیږي. د سوداګریزو اړیکو د پراختیا لپاره اسانتیاوې زیاتې شوي، او د افغانستان ترانزیت له ایران څخه ترکیې ته هم روان دی.
د طالبانو د بهرنیو چارو وزارت د خبرپاڼې له مخې، د ایران د بهرنیو چارو وزارت مرستیال حمید قنبري په کابل کې د کانونو او برېښنا د تولید په برخو کې له افغانستان سره د همکارۍ چمتووالی اعلان کړی. ایران د هرات او مزار شریف ترمنځ د رېللارې په جوړولو کې هم برخه اخیستلو ته چمتو دی، چې دا د اقتصادي اړیکو د پراختیا لپاره مهم ګام دی.
موضوع: د ایران او افغانستان ترمنځ اقتصادي اړیکې
سرچینه: Azadi Radio Pashto Reports
