په فرانسه کې د تاوتریخجنو مظاهرو له امله شاوخوا ۱۸۰۰ کسان نیول شوي، او په مختلفو ښارونو کې نږدې یو نیم زر دوکانونه او مغازې زیانمنې شوې دي. د دې پېښو له کبله مالي زیانونه په سلګونو میلیونو یورو اټکل شوي دي.
لاریونونه د شنبې په ورځ د ژوند د لګښتونو د لوړوالي پر وړاندې د اعتراض په توګه پیل شول. په دې مظاهرو کې، چې د پاریس، لیون او لیموژ په ګډون په څو ښارونو کې ترسره شوې، تاوتریخوالی، چور او تالان، او اور اچونې رامنځته شوې. په لیموژ ښار کې د ښاروالۍ تاریخي ودانۍ هم د اور له امله له منځه تللې ده.
د فرانسې کورنیو چارو وزارت ویلي چې شاوخوا ۵۰۰ پولیس، د اور وژنې کارکوونکي او د روغتیایي بیړنیو مرستو پرسونل ټپيان شوي دي. په سینټ ایټین ښار کې، د یو ۱۷ کلن هلک لاس د بم د چاودنې له امله پرې شوی دی، چې د ګڼې ګوڼې د کنټرول لپاره کارول شوی و.
په پاریس کې د یو لاریون پر مهال یوه مړینه هم رامنځته شوې، خو چارواکو ویلي چې دغه مړینه د روغتیایي ستونزې له امله وه او د مظاهرو سره یې تړاو نه درلود.
د امریکا ولسمشر ډونالډ ټرمپ په دې اړه څرګندونې کړې او ویلي یې دي چې په فرانسه کې رامنځته شوې ګډوډۍ د کډوالۍ له مسلې سره تړاو لري. هغه له فرانسې غوښتنه کړې چې د کډوالۍ قوانین لا سخت کړي.
موضوع: د فرانسي مظاهرې او تاوتریخوالی
سرچینه: Azadi Radio Pashto NEWS
