جرمنی، اتریش، یونان، دنمارک او هلند اعلان وکړ چې د روان میلادي کال تر پای پورې د اروپایي اتحادیې نه بهر د قانوني اقامت نلرونکو کډوالو د راستنېدو مرکزونو د جوړولو په اړه له نورو هیوادونو سره هوکړه کولو هڅه کوي.
د دې هیوادونو د داخله چارو وزیران چې د "پنځو ګروپ" په نوم یادیږي، د جمعې په ورځ په کپنهاګ کې په یوه ناسته کې وویل چې د دې هوکړې لپاره مشخص ګامونه اخیستل شوي، خو د احتمالي کوربه هیوادونو نومونه یې نه دي یاد کړي.
الکساندر دوبرینت، د جرمنی داخله وزیر وویل چې هدف دا دی چې د دریمو هیوادونو سره هوکړه د روان کال په ترڅ کې نهایی شي. دا ګروپ به د سپتمبر په پای کې بیا په مونیخ کې غونډه وکړي.
د اروپا پارلمان په جون میاشت کې د مهاجرت په سیاست کې اصلاحات تصویب کړل چې د کډوالو د اخراج پروسه چټکه کوي او د اروپایي اتحادیې نه بهر د راستنېدو مرکزونو جوړول ممکن کوي.
د اروپا شورا او ځینې بشري حقونو مدافع سازمانونه خبرداری ورکړی چې دغه مرکزونه ممکن د پناه غوښتونکو بنسټیز حقوق نقض کړي. د دنمارک د پناه غوښتونکو شورا هم ویلي چې دا طرحه به د کډوالو د خطرناکو لارو کارولو مخه ونه نیسي.
دنمارک حکومت تمه لري چې تر ۲۰۲۷ کال پورې د کډوالو د انتقال لپاره د دې مرکزونو جوړول ممکن شي. د پنځو هیوادونو چارواکو هم ویلي چې د راتلونکو مرحلو په اړه به د نړیوال مهاجرت سازمان او د ملګرو ملتونو د پناه غوښتونکو عالي کمیشنر سره خبرې وکړي.
موضوع: د کډوالو د راستنېدو مرکزونو جوړول
سرچینه: Azadi Radio جهان
