د پاکستان د کورنیو چارو وزیر محسن نقوي څرګنده کړې چې له افغانستان سره به ټولې سرحدي دروازې او ټرانزیټي لارې بېرته پرانیستل شي. د پاکستاني رسنیو د راپور له مخې، نقوي دا اعلان د شنبې په شپه (۱۷ د زمري) د سوداګریزې ټولنې استازو سره په یوه غونډه کې وکړ.
د غونډې په ترڅ کې، نقوي د پاکستان او افغانستان ترمنځ د سوداګرۍ د خنډونو د لرې کولو او د مالونو د لېږد د اسانتیا لپاره مختلف اقدامات تر بحث لاندې ونیول. د دې ترڅنګ، د دواړو هېوادونو ترمنځ د اتباعو لپاره د قانوني سفرونو اسانتیا هم مطرح شوه، خو په دې اړه کومه ځانګړې پرېکړه نه ده شوې.
د راپور له مخې، د دې غونډې وروسته، د پاکستان حکومت چارواکو تر اوسه پورې د سرحدي دروازو او ټرانزیټي لارو د بېرته پرانیستلو په اړه رسمي څرګندونې نه دي کړي.
یادونه باید وشي چې د افغانستان او پاکستان ترمنځ سرحدي دروازې او ټرانزیټي لارې تېر کال د طالبانو او پاکستان ترمنځ د پوځي نښتو له امله تړل شوې وې. د دې نښتو له پراخېدو وروسته، دواړو لورو خپلې لارې وتړلې، او یوازې د ننګرهار تورخم، د کندهار سپینبولدک او د هلمند بهرامچې سرحدي دروازې د افغان کډوالو د بېرته ستنېدو لپاره پرانستې پاتې شوې دي.
موضوع: پاکستان د افغانستان سره د سرحدي دروازو پرانیستل
سرچینه: روزنامه اطلاعات روز پښتو
