د امریکا د سنای مجلس د کارولینای جنوبی سناتور لیندسی گراهام د مړینې وروسته، هغه طرحه چې د روسیې پر وړاندې د پراخو تحریمونو لپاره وړاندې شوې وه، تصویب کړه. دغه طرحه د نفت او ګاز د مشتریانو پر وړاندې تر ۱۰۰ سلنې پورې تعرفې وضع کوي. د رویترز خبري اژانس د جمعې په ورځ (۱۶ اسد) راپور ورکړ چې دغه طرحه د ۸۶ موافقو او ۱۱ مخالفو رایو په مرسته تصویب شوې ده.
دا طرحه به اوس د نمایندګانو مجلس ته وړاندې شي، او که تصویب شي، دونالد ټرمپ، د امریکا ولسمشر، به یې قانوني کړي. لیندسی گراهام، چې د تېرې میاشتې په ترڅ کې وفات شو، د اوکراین د پلوه د کنگرې یو له څرګند متحدانو څخه و او د روسیې پر وړاندې یې سخت دریځ درلود. هغه دغه لایحه د مسکو پر اقتصادي فشار زیاتولو لپاره وړاندې کړې وه.
دغه لایحه چې د "لیندسی او. گراهام د روسیې او ایران د تحریم قانون ۲۰۲۶" په نوم یادیږي، د روسیې پر نفت، ګاز او چارواکو پراخ تحریمونه وړاندیز کوي. همدارنګه، که دا قانون شي، نو د چین، هند، جاپان او ځینو اروپایي اتحادیې غړو هېوادونو پر وړاندې تر ۱۰۰ سلنې پورې درانه تعرفې وضع کوي، تر څو د روسیې پر نفت او ګاز د دوی تکیه کمه شي.
د اوکراین سفارت په واشنګټن کې د دې طرحې تصویب هرکلی کړی او دا یې "مهم او پر وخت ګام" بللی دی. خو رویترز راپور ورکوي چې ممکن دا طرحه په نمایندګانو مجلس کې کافي ملاتړ ونلري، ځکه ځینې قانون جوړونکي او صنعتونه اندیښنه لري چې د ټرمپ نوې تعرفوي واکونه به د امریکایي واردونکو او مصرفونکو لګښتونه زیات کړي.
د نیویارک استازی ګریګوري میکس او د ویرجینیا استازی دان بایر په یوه ګډه اعلامیه کې ویلي چې د ټرمپ د تعرفوي واکونو په اړه لا هم "بنسټیز اندیښنې" شته. دوی ویلي چې "دا لایحه هغه څه ورکوي چې... د تعرفو نوې او پراخه واکونه دي چې ولسمشر یې بې پروايۍ سره کارولی شي، لکه څنګه چې په تېر کې یې کړی دی." د کنتاکي سناتور رند پال، چې د دې لایحې پر وړاندې رایه ورکړه، هم د دموکراتانو سره همغږی دی او د روسیې د نفت او ګاز مشتریانو پر وړاندې تر ۱۰۰ سلنې پورې تعرفې د "امریکایي مصرفونکو پر وړاندې مالیه" بللې ده.
لیندسی گراهام د دونالد ټرمپ یو له متحدانو او د روسیې او ایران پر وړاندې سخت مخالف و. هغه تېرې میاشت ناڅاپه مړ شو او د مرګ علت یې د زړه ستونزې بلل شوې. د هغه خور دارلین گراهام د ټرمپ په حکم د سنای مجلس پر څوکۍ ناستې ده.
سرچینه: روزنامه اطلاعات روز
