یو دیپلوماتیک منبع د پنجشنبې په ورځ، د میزان ۱۶ مه، فرانسې خبري اژانس ته ویلي چې فرانسه د طالبانو سره خبرې پیل کړې دي تر څو د افغان کډوالو د راستنیدو پروسه آسانه کړي. فرانسه له ۲۰۲۱ کال د اګست میاشتې راهیسې د طالبانو سره هیڅ رسمي اړیکې نه لري او د دې هیواد سفارت په کابل کې لا هم تړلی دی.
په هر حال، فرانسه د شاوخوا ۲۰ نورو اروپایي هیوادونو سره، لکه جرمني، بلجیم او سویدن، د افغان کډوالو د راستنیدو پروسه چټکه کولو لپاره هڅې کوي، په ځانګړې توګه د هغو کسانو لپاره چې د محکمې له خوا مجرم بلل شوي دي. دیپلوماتیک منبع ویلي: "لکه څنګه چې نورو اروپایي هیوادونو سره، د طالبانو سره تخنیکي خبرې پیل شوي تر څو د هغو افغانانو چې په غیرقانوني حالت کې دي او د عامه نظم لپاره ګواښ ګڼل کیږي، راستنیدل آسانه شي."
طالبان چې د اروپایي اتحادیې له خوا نه دي رسمیت پیژندل شوي، هڅه کوي چې په نړیواله کچه خپل مقام پیاوړی کړي. مخکې له دې، ځینې اروپایي هیوادونه د مجرم افغان کډوالو د راستنیدو لپاره نه یوازې د طالبانو سره خبرې کړې، بلکې د طالبانو استازي یې په خپلو سفارتونو کې هم منلي دي.
خو لا هم روښانه نه ده چې آیا فرانسه به طالبانو ته داسې امتیاز ورکړي یا نه. د فرانسې د بهرنیو چارو وزارت د دې پوښتنې په اړه چې آیا طالبانو ته به د سفر اجازه ورکړل شي، ځواب نه دی ورکړی. دیپلوماتیک منابعو د هغو کسانو شمېر چې ممکن له فرانسه څخه راستنیدل شي، نه دی مشخص کړی، خو یوه بله منبع وایي چې دا شمېر ممکن تر سلګونو پورې ورسیږي.
د فرانسې د بهرنیو چارو وزارت په تیر جولای کې تایید کړې وه چې پاریس د هغو افغانانو د راستنیدو لپاره چې په غیرقانوني توګه په فرانسه کې ژوند کوي او د امنیتي ګواښ په توګه ارزول کیږي، تخنیکي اړیکې پیل کړي دي. که څه هم یوه منبع د طالبانو حکومت سره د خبرو په اړه څه نه دي ویلي، خو زیاته کړې یې ده چې اروپایي هیوادونه د کډوالو په اړه د طالبانو سره په تماس کې دي. د فرانسې د بهرنیو چارو وزارت ټینګار کړی چې دا خبرې د پاریس د طالبانو په اړه د دریځ بدلیدو یا د دې ډلې د حکومت په توګه د رسمیت پیژندلو معنی نه لري.
فرانسه همدارنګه د افغانستان کې د بشري حقونو د سرغړونو، په ځانګړې توګه د ښځو او نجونو د حقونو د سرغړونو په اړه خپل مخالفت تکراروي. دیپلوماتیک منبع ویلي: "دا تخنیکي خبرې زموږ د افغانستان په اړه دریځ نه بدلوي." دا منبع زیاتوي: "موږ لا هم د افغانانو، په ځانګړې توګه د افغان ښځو، ملاتړ ته ادامه ورکوو."
موضوع: فرانسه د افغان کډوالو د راستنیدو لپاره د طالبانو سره خبرې کوي
سرچینه: Azadi Radio افغانستان
