د طالبانو د لومړي وزیر اقتصادي مرستیالۍ دفتر په هرات ولایت کې د خوراکي توکو، درملو او صحي محصولاتو د کیفیت ارزونې لابراتور د پرانیستلو خبر ورکړی دی. دغه لابراتور نن (یکشنبه، ۱۸ اسد) د عبدالغني برادر، اقتصادي مرستیال، او عبدالسلام حنفی، اداري مرستیال په حضور کې پرانیستل شو.
عبدالغني برادر د لابراتور د پرانیستلو په مراسمو کې وویل چې له دې وروسته به د افغانستان ته د واردېدونکو خوراکي توکو، درملو او صحي محصولاتو کیفیت او اعتبار د همدې لابراتور له لارې ارزول کېږي. هغه زیاته کړه چې دا اقدام به د بی کیفیت، تقلبی او غیر معياري موادو واردول مخنیوی وکړي.
برادر همدارنګه وویل چې دغه لابراتور به د وارداتي توکو ترڅنګ د داخلي تولیداتو د کیفیت تثبیت او د صادراتو د پرمختګ لپاره هم کار وکړي. د هغه په وینا، دا به افغان محصولات د نورو هېوادونو سره د کیفیت په لحاظ سیال کړي او په نړیوالو بازارونو کې به یې معتبر ځای ترلاسه کړي.
د طالبانو اقتصادي مرستیال تاجران هڅولي چې د بی کیفیت محصولاتو واردول بند کړي او له داخلي تولیدونکو څخه یې غوښتنه کړې چې د خپلو تولیداتو کیفیت ته پام وکړي. طالبانو مخکې هم په ځینو نورو ښارونو کې د کیفیت ارزونې لابراتورونو د پرانیستلو خبر ورکړی و.
په هر حال، د هېواد وګړو د وارداتي او داخلي تولیداتو، په ځانګړې توګه د خوراکي او درملو محصولاتو، د کیفیت په اړه څو ځله شکایتونه کړي دي.
موضوع: هرات کې د خوراکي توکو او درملو د کیفیت ارزونې لابراتور
سرچینه: روزنامه اطلاعات روز
