طالبانو اعلان کړی چې په هلمند کې یې د دوو کوچنیو نجونو د جبري واده مخه نیولې ده. د طالبانو محلي اداره په هلمند کې وایي چې په دې وروستیو کې یو سړی په ولسوالی گرمسیر کې خپله شپږ کلنه لور د ۲۰۰ زره پاکستانی کلدارو په بدل کې د ۶۰ کلن سړي سره واده کړې وه. د طالبانو د والي دفتر په یوه اعلامیه کې ویلي چې دا واده چې جبري و، د دوی په مداخله سره لغو شوی دی.
د طالبانو ادارې په یوه جلا اعلامیه کې ویلي چې یوه اته کلنه نجلۍ هم په ولسوالی نادعلي کې د خپلې کورنۍ لخوا د ۸۰ کلن سړي سره واده شوې وه، چې د طالبانو د امر به معروف او نهي عن المنکر ادارې دغه واده هم لغو کړی دی.
دا په داسې حال کې ده چې د ملګرو ملتونو د ښځو ادارې (یو ان ومن) په یوه راپور کې ویلي و چې د طالبانو د واکمنۍ له بیا پیلیدو وروسته، د ښځو او نجونو پر وړاندې د محدودیتونو او ممنوعیتونو له امله، تمه کیږي چې تر ۲۰۲۶ کال پورې د قانوني عمر نه کم نجونو واده ۲۵ سلنه زیات شي.
د نړیوالو سازمانونو اندیښنې د دې لپاره دي چې په افغانستان کې د ماشومانو واده زیاتېږي. د طالبانو حکومت د واده د اصولو په یوه سند کې، چې څو ورځې مخکې یې په رسمي جریده کې خپور شو، په ځینو مواردو کې د ماشومانو واده "صحیح" بللی دی.
موضوع: د ماشومانو واده په افغانستان کې
سرچینه: Azadi Radio خبر ها
