د طالبانو د امنیې قوماندانۍ ویاند خالد ځدراڼ په تازه څرګندونو کې ویلي، چې د دې ډلې ځواکونو سره په یوه نښته کې څلور وسله وال غله وژل شوي دي. هغه د دوشنبې په ورځ، د زمري ۱۹مه، پر «ایکس» شبکه کې لیکلي چې دا پېښه د کابل ښار د اتلسمې امنیتي حوزې اړوند سیمه کې رامنځته شوې ده.
ځدراڼ زیاته کړې، چې دغه وسله وال غله د غلا په نیت یوه کور ته ننوتلي وو. د طالبانو ځواکونو د هغوی پر وړاندې عملیات پیل کړل، چې په پایله کې د نښتې پر مهال څلور تنه وژل شوي دي. د هغه په وینا، د دې کسانو څخه دوه میله تومانچې هم ترلاسه شوي دي.
دا لومړی ځل نه دی چې طالبان د غلا په تور وسله وال وژني. نږدې دوه اوونۍ وړاندې هم طالبانو خبر ورکړی و چې د کابل ښار د اتمې امنیتي حوزې په سیمه کې یې له خپلو ځواکونو سره په نښته کې اووه وسله وال غله وژلي. د دغو وژل شویو کسانو هویت لا هم نه دی څرګند شوی.
د طالبانو د دې ډول اقداماتو په اړه انتقادونه هم شته، چې منتقدان یې د «صحرایي محکمې» په نوم یادوي. په دې ترڅ کې، طالبان په ځینو مواردو کې تورن شوي چې بېګناه کسان او خپل مخالفان د وسله والو غلو په توګه وژني.
د طالبانو د دې کړنو په اړه د بشري حقونو سازمانونه هم اندېښنې لري او د دې ډول اقداماتو د پایلو په اړه یې غبرګونونه ښودلي دي.
موضوع: د طالبانو د غلا پر ضد اقدامات
سرچینه: روزنامه اطلاعات روز پښتو
