د جرمني د پوځ د فضايي ځواک قوماندان مایکل تراوت ویلي، چې د روان کال په مې میاشت کې، روسیې څلور پوځي سپوږمکۍ د فنلنډ د «ایسيای» شرکت یوه سوداګریزه سپوږمکۍ څارلې. دا عمل ممکن د ستارلېنک په شمول د سوداګریزو سپوږمکیو شبکو ته خطر پېښ کړي. روېټرز خبري اژانس د جمعې په ورځ، د تلې په ۱۷مه، د مایکل تراوت له قوله راپور ورکړی چې دغه فعالیتونه ښيي روسیه داسې وړتیاوې لري چې د سپوږمکیو د لویو شبکو پر وړاندې، ان له مستقیم برید پرته هم د سپوږمکیو کاري موده او د هغوی د خدمتونو کیفیت کمولای شي.
لوېدیځ پوځي چارواکي وايي، چې د ۲۰۲۲ کال راهیسې، کله چې روسیه پر اوکراین برید وکړ، د لوېدیځو فضايي سیستمونو پر وړاندې د مسکو فعالیتونه زیات شوي دي. په دې فعالیتونو کې د سپوږمکیو اړیکو کې ګډوډي رامنځته کول او د معلوماتو راټولولو په هدف د ځمکې په مدار کې د هغوی څارل شامل دي.
روسیې د روېټرز پوښتنو ته په دې اړه ځواب نه دی ورکړی، خو مخکې یې خبرداری ورکړی و چې هغه لوېدیځې سوداګریزې سپوږمکۍ چې له اوکراین سره مرسته کوي، ښايي د غچ اخیستنې اقداماتو سره مخ شي. د سپېساېکس شرکت هم په دې اړه د روېټرز پوښتنې ته ځواب نه دی ویلی.
د مایکل تراوت څرګندونې د دې ښکارندویي کوي چې روسیه د فضايي جګړې په برخه کې پرمختګونه کوي او د لوېدیځو هېوادونو د فضايي سیستمونو د خنثی کولو لپاره مختلفې تکتیکونه کاروي. دا وضعیت د نړیوال امنیت لپاره یوه جدي اندیښنه ده.
موضوع: روسیه د اوکراین ملاتړ کوونکو سپوږمکیو څارنه
سرچینه: Azadi Radio Pashto NEWS
