بخښنې نړیوال سازمان په تازه څرګندونو کې ویلي چې د طالبانو نوی «شرطه» قانون ممکن د خلکو پر ځینو اساسي حقونو او ازادیو منفي اغېز وکړي. دغه سازمان د چهارشنبې په ورځ، د وږې پر ۴مه، په ټولنیزه شبکه اېکس کې د دې قانون په اړه اندیښنې څرګندې کړې.
د بخښنې نړیوال سازمان له مخې، د دې قانون یوه مهمه اندیښنه د هر ډول لاریونونو او اعتراضونو پر وړاندې عمومي بندیز دی، چې د سولهییزو غونډو حق سره په ټکر کې بلل شوی دی. دغه سازمان یادونه کړې چې دا بندیز به په افغانستان کې د موجودو اساسي ازادیو محدودیتونه لا زیات کړي.
د طالبانو عدلیې وزارت په دې اړه اعلان کړی چې د پولیسو لپاره یې د «شرطه» په نوم نوی قانون تصویب کړی دی. د دې وزارت د خبرپاڼې له مخې، چې د زمري پر ۳۱مه په اېکس کې خپره شوې، دغه قانون دوه بابونه، پنځه فصلونه او ۵۳ مادې لري، او د طالبانو د مشر هبتالله اخندزاده لهخوا توشېح شوی دی.
د یاد قانون په ۵۰مه ماده کې راغلي چې په ټول افغانستان کې د هر ډول «لاریون» ترسره کول منع دي. بخښنې نړیوال سازمان په دې اړه هم ویلي چې طالبانو په تېرو کلونو کې د معترضانو او مخالفانو پر وړاندې د خپلسرو نیونو، توقیفونو، شکنجې او ناوړه چلند له لارې چلند کړی دی.
دغه سازمان له طالبانو غوښتنه کړې چې هغه فرمانونه او پالېسۍ لغوه کړي چې د افغانستان له نړیوالو ژمنو سره په ټکر کې دي.
موضوع: د طالبانو نوي قانون او د بشري حقونو وضعیت
سرچینه: Azadi Radio Pashto NEWS
