د متحده عربي اماراتو چارواکو اعلان کړی چې د تېلو د ککړتیا له امله د رأسالخیمې ټول ساحلونه تر بلې خبرتیا پورې تړل شوي دي. مخکې له دې، د امالقیوین ساحلونه او د شارجې د الحمریه ساحل هم تړل شوي وو.
د اماراتو د اقلیمي بدلون او چاپېریال وزارت د جمعې په ورځ وویل چې د خلیج په اوبو کې د یوې تېل وړونکې بېړۍ له امله د تېلو د بهېدو پیښه رامنځته شوې، چې له کبله یې د امالقیوین ساحلي اوبه ککړې شوې دي. د رویټرز د راپور له مخې، د «جم نمبر ۲» په نوم بېړۍ د دې ککړتیا لامل ګڼل کیږي.
دا بېړۍ د اکتوبر په ۹مه نېټه د یوه نامعلوم توغندي یا توغول شوي شي د لګېدو له امله اور اخیستی و. سپوږمکۍ تصویرونه ښیي چې د تېلو ککړتیا شاوخوا ۱۶۰ کیلومتر مربع سیمه نیولې ده. کارپوهانو خبرداری ورکړی دی چې سمندري جریانونه دا ککړتیا د شارجې او عجمان بندرونو او د اوبو د خوږولو تاسیساتو ته هم رسولی شي.
تر اوسه پورې چارواکو په رسمي توګه د ککړتیا علت نه دی تایید کړی، خو د دې پیښې له امله د ساحلونو تړل د خلکو او د چاپېریال د ساتنې لپاره یوه مهمه پریکړه ګڼل کیږي. د دې ککړتیا د پراختیا مخنیوي لپاره اړین تدابیر باید ونیول شي.
موضوع: د تېلو د ککړتیا پیښه په رأسالخیمه کې
سرچینه: Azadi Radio Pashto NEWS
