یو ورځ وروسته له هغې چې د امریکا د خزانې وزیر وویل چې د ایران چارواکو د واشنګټن د اقتصادي فشارونو اغېزمنتیا «منلې» ده، د ایران ولسمشر مسعود پزشکیان د جګړې د پای ته رسولو او د خبرو له لارې د اختلافاتو د حل پر اړتیا ټینګار وکړ. پزشکیان د چهارشنبې په ورځ «د سنبلې په ۴مه» وویل: "جګړه تل د حل لاره نهده. هغه غوټه چې په لاس پرانیستل کېدای شي، باید په غاښونو پرانیستل نهشي."
پزشکیان په دې اړه وویل چې د «تدبیر او فکر» له لارې ستونزې حلولای شو او د ایران او امریکا ترمنځ له مؤقتي تفاهملیک څخه یې دفاع وکړه. دا څرګندونې په داسې حال کې کېږي چې د ایران په حکومت کې یو شمېر سیاسي مخالف ګوندونه له امریکا سره د خبرو له اصل سره مخالفت کوي او د تفاهملیک له امله پر چارواکو نیوکې کوي.
حسن شریعتمداري، د کیهان ورځپاڼې مسؤل مدیر، د ایران د پارلمان پر رئیس محمد باقر قالیباف نیوکه کړې او په غیر مستقیم ډول یې هغه له «لوېدیځ پلوه» جریان سره نږدې تورن کړی دی. قالیباف په ځواب کې ویلي چې "له نړۍ سره تعامل له وابستهګۍ او تسلیمېدو سره توپیر لري".
د سې شنبې په ماښام، پزشکیان د ایران له مرکزي بانک څخه د لیدنې پر مهال وویل چې حکومت غواړي خپلې ستونزې د «تعامل او خبرو» له لارې حل کړي. هغه همدارنګه وویل چې امریکا په جګړه کې خپلو هدفونو ته نهده رسېدلې او د اقتصادي فشارونو له لارې به هم بریالۍ نهشي.
د امریکا د خزانې وزیر سکاټ بسنټ د نویو بندیزونو له اعلان وروسته وویل چې د ایران چارواکو د امریکا د اقتصادي فشارونو «اغېزمنتیا» منلې ده. هغه د ایران د اقتصادي وضعیت په اړه د قالیباف څرګندونو ته هم اشاره وکړه او وویل چې د مالي جریان، اقتصادي ودې او کورني تولید پرته، حتی پوځي ځواک هم د حکومت د بقا ضمانت نهشي کولای. بسنټ همداراز وویل چې امریکا خپلو هلو ځلو ته دوام ورکوي څو د ایران حکومت اقتصادي لارې پرې کړي او تهران منزوي شي.
موضوع: ایران د جګړې د پای ته رسولو غوښتنه
سرچینه: Azadi Radio Pashto Reports
