د امریکا متحده ایالاتو لهخوا پر ایراني هوايي شرکتونو د بندیزونو لګولو وروسته، د دغو شرکتونو ګڼ شمېر نړیوالې الوتنې د پنجشنبې په ورځ لغوه شوې. د امریکا د خزانې وزیر سکاټ بسنټ د ایران پر وړاندې د اقتصادي فشارونو زیاتېدو ته په اشارې وویل چې "موږ پر ایرانیانو داسې سخت اقتصادي فشار راوستی چې تر دې مخکې یې هېڅکله ساری نهو لیدلی".
بسنټ له فاکس نیوز سره په مرکه کې وویل چې د بندیزونو له لګېدو وروسته ښايي د ایران له ۸۰ تر ۹۰ سلنې پورې نړیوالې الوتنې درېدلې وي. هغه زیاته کړه چې د ملګرو ملتونو استازی به څنګه خپل هېواد ته ستانه شي، په اړه یې ډاډه نه و.
د متحده عربي اماراتو د هوايي چلند ادارې اعلان وکړ چې د امریکا د نوې تګلارې له مخې به د ایراني هوايي شرکتونو ټولې الوتنې تر بلې خبرتیا پورې ودرول شي. د ایران تسنیم خبري اژانس راپور ورکړی چې عمان، ګرجستان، اذربایجان او د عراق پلازمېنې بغداد ته الوتنې هم درول شوې دي.
د امریکا د خزانې وزارت مخکې ویلي و چې د «اقتصادي طرد عملیات» په نوم د پلان له مخې به د ایراني هوايي شرکتونو نړیوال فعالیتونه د تلې میاشتې له لومړۍ نېټې څخه د ثانوي بندیزونو په لګولو سره ودرول شي. د فارس خلیج سیمې ځینو نورو هېوادونو هم د ایران پر الوتنو محدودیتونه لګولي دي.
د ایران د ملي امنیت شورا منشي محسن رضايي، د ایراني الوتنو د درېدلو په غبرګون کې، ګواښ وکړ چې که ګاونډي هېوادونه له امریکا سره همکاري وکړي، "د هغوی د هوايي ډګرونو الوتنې به هم ودرول شي". رضايي د ایران له دولتي ټلوېزیون سره په مرکه کې وویل چې "که د امریکا ترڅنګ ودرېږئ، موږ به مو ننداره ونهکړو".
چین، چې د ایران له مهمو سوداګریزو شریکانو څخه دی، د امریکا لهخوا د ایراني هوايي شرکتونو پر وړاندې د بندیزونو سره مخالفت څرګند کړ.
موضوع: د ایراني الوتنو لغوه کېدل
سرچینه: Azadi Radio Pashto Reports
